قازاقستاننان كەتكەن جوعارى ءبىلىمدى ماماندار سانى رەكوردقا جەتتى

 استانا. قازاقپارات - قازاقستاننان كەتىپ جاتقان بىلىكتى ماماندار سانى ارتتى. وتكەن جىلى جوعارى ءبىلىم العان ەميگرانتتار سانى رەكوردقا جەتتى.

 ەگەر بۇرىنعى جىلدارى شەتەلگە قالا تۇرعىندارى كەتسە، سوڭعى جىلدارى اۋىل جاستارى كەتە باستادى، دەپ حابارلايدى 31 - ارنا.

 بيزنەس- ساراپشى يرينا بەلوۆا سوڭعى ۋاقىتتارى شەتەلگە كەتۋدى ويلاپ ءجۇر. ونىڭ ويىنشا، شەتەلدە جۇمىس تا تابىلادى، جاعدايى دا جاقسى. ول جاقتا بالالار دا ساپالى ءبىلىم الا الادى، دەيدى يرينا.

«شىندىعىن ايتسا قازاقستاندىق ديپلوم تەك قازاقستانعا عانا جارامدى. ەگەر ءبىز باسقا ەلدەردە جۇمىس ىستەۋ مۇمكىندىگى تۋرالى ايتاتىن بولساق، ونى كوبىنەسە راستاۋ قاجەت» ، - دەيدى يرينا بەلوۆا.

وتكەن جىلى قازاقستاننان 38 مىڭ ادام كەتكەن. ولاردىڭ جارتىسىنان كوبى جوعارى ءبىلىمدى ماماندار. بۇل كورسەتكىشتى 2015 -جىلمەن سالىسىترعاندا 17 پايىزعا ارتقان.

«كوبىنە شەتەلگە تەحنيكالىق ماماندار كەتكەن - 6,6 مىڭ ادام، ەكونوميكا ماماندارى - 3,6 مىڭ، پەداگوگيكالىق - 2,6 مىڭ ادام» ، - دەيدى Finprom.kz ساراپشىسى ازامات قاسىمبەك.

ەگەر ەل ازاماتتارى جىلدا وسىنداي مولشەردە كەتەتىن بولسا قازاقستاندا بىرنەشە جىلدان كەيىن ماماندار تاپشىلىعى بولادى. بوس جۇمىس ورىندارى تولادى. دەگەنمەن، ولاردىڭ ورنىن باسەكەگە قابىلەتسىز ماماندار باساتىن بولادى. باسقاشا ايتقاندا ساپالى ماماندار كەتىپ، ساپاسىزدارى قالادى. ەڭ قورقىنىشتىسى - حالىقتى كىم ەمدەيدى، كىم وقىتادى، كىم دامىتادى؟ «ارينە تولەم جۇيەسىن وزگەرتۋ قاجەت. ادام قابىلەتىنە، بىلىمنە قاراي كەلۋ كەركە. بىرەۋدىڭ تۋىسى بولىپ ەمەس» ، - دەيدى ساياساتتانۋشى تولعاناي ۇمبەتاليەۆا.

ەلىن تاستاپ كەتۋشىلەردىڭ كوپشىلىگى شەتەلگە بارعىسى كەلگەننەن ەمەس ءماجبۇر بولعاندىقتان كەتەدى. ولار ەلدى جەمقورلىق جايلاپ العانىندىقتان دامۋدىڭ جوقتىعىن سەزگەننەن وسىنداي شەشىمگە بارادى.