نۇرسۇلتان نازاربايەۆ: قازاقستان مەن قىتاي بالامالى ەنەرگەتيكا سالاسىنداعى ىنتىماقتاستىقتى ارتتىرادى
«ءبىز بۇل جۇمىستاردى ءىس جۇزىندە باستاپ تا كەتتىك. جالپى، كومىرسۋتەكتەر، مۇناي مەن گاز ءالى دە ءبىراز ۋاقىت پايدالانىلاتىن بولادى. دەگەنمەن، بۇكىل الەم بالامالى ەنەرگەتيكاعا بەت الىپ وتىر. بالامالى ەنەرگەتيكا - بۇل بالامالى ەكونوميكا. ويتكەنى، ءبىز مۇناي مەن گازعا باي ەلمىز. ول ءبىزدىڭ ەكونوميكامىزدىڭ باسىم بولىگىن قۇرايدى جانە مۇنداي ەل وتە كوپ. سوندىقتان بىزگە مۇنان كەتۋ قاجەت. ول ءۇشىن ءبىز وسىدان 6 جىل بۇرىن يندۋستريالاندىرۋ باعدارلاماسىن جۇزەگە اسىرا باستادىق. ياعني، شيكىزات رەسۋرستارىنا بالاما جۇمىس ورىندارىن بەرەتىن زاۋىتتاردى سالۋدى قولعا الدىق» ، - دەدى ەلباسى.
ق ر پرەزيدەنتىنىڭ ايتۋىنشا، ناتيجەسىندە بۇگىندە مىڭنان استام كاسىپورىن سالىپ، ولاردا جۇزدەگەن مىڭ جاڭا جۇمىس ورنى قۇرىلدى. «بۇل ءبىرىنشى نۇسقا. ەكىنشى نۇسقا - سۋ، جەل، كۇن سىندى بالامالى ەنەرگەتيكا كوزدەرىن سالۋ. قىتاي حالىق رەسپۋبليكاسى دا سونىمەن اينالىسۋدا جانە ءبىز سەرىكتەسپىز، بىرگە جاسايمىز. قازىرگى ۋاقىتتا اتالعان كوزدەردەن ەلەكتر ەنەرگياسىن وندىرەتىن سونداي بىرنەشە ستانسانى بىرلەسىپ سالىپ جاتىرمىز. سوندىقتان دا بۇل باعىت وتە ماڭىزدى دەپ ويلايمىن. ءبىز عىلىمي- تەحنيكالىق پروگرەسس سىندى باسقا ماسەلەلەردە دە سەرىكتەسپىز» ، - دەدى نۇرسۇلتان نازاربايەۆ.
مارلان جيەمباي