قازاقستاندا «ادەبيەت بەلدەۋى» جوباسى ىسكە قوسىلادى
بۇل تۋرالى ق ر پرەزيدەنتى اكىمشىلىگى ىشكى ساياسات ءبولىمىنىڭ مەڭگەرۋشىسى ايدا بالايەۆا ايتتى، دەپ حابارلايدى قازاقپارات.
اقوردادا وتكەن ق ر پرەزيدەنتى جانىنداعى قوعامدىق سانانى جاڭعىرتۋ باعدارلاماسىن ىسكە اسىرۋ جونىندەگى ۇلتتىق كوميسسيانىڭ كەزەكتى وتىرىسىندا ول «تەاتر زەرتحاناسى» جانە «ادەبيەت بەلدەۋى» جوبالارىنىڭ ىسكە قوسىلاتىندىعىن اتاپ ءوتتى.
«تەاتر زەرتحاناسى ەلىمىزدىڭ بۇكىل وڭىرلەرىنىڭ جاس ارتىستەرىنىڭ ءبىرتۇتاس شىعارماشىلىق ۇجىمى رەتىندە ولاردىڭ شىعارماشىلىعى الەۋەتىن اشۋعا، اكتەرلىك شەبەرلىكتەرىنىڭ دەڭگەيىن كوتەرۋگە سەپتىگىن تيگىزەدى. سونىمەن قاتار وڭىرلىك اكتەرلەرگە تانىمال الەمدىك رەجيسەرلەر مەن قويۋشىلاردىڭ جەتەكشىلىگىمەن پەسالار مەن قويىلىمداردا ويناۋعا مۇمكىندىك بەرەدى. جوبانىڭ باستى ماقساتى - الەمدىك اديتوريانىڭ قازىرگى زامانعى قازاقستاندىق تەاتر ونەرىنە قىزىعۋشىلىعىن ارتتىرۋ جانە تالانتتى جاس اكتەرلەردى حالىقارالىق دەڭگەيدە كوتەرمەلەۋ»، - دەدى ايدا بالايەۆا.
ونىڭ ايتۋىنشا، «ادەبيەت بەلدەۋى» جوباسى قازىرگى اۆتورلاردىڭ جاڭا دەڭگەيگە كوتەرىلۋىنە مۇمكىندىك بەرىپ، الەۋەتتەرىن اشۋعا سەپتىگىن تيگىزەدى.
«بۇعان قوسا بۇل جوبا ادەبي قوعامداستىقتىڭ قوعامدىق سانانى جاڭعىرتۋ پروتسەسىنە تارتىلۋىن قامتاماسىز ەتىپ، قازىرگى ادەبيەتتىڭ دامۋىنا تىڭ سەرپىن بەرەدى. بۇل جۇمىس «تۋعان جەر» ەنتسيكلوپەدياسى توڭىرەگىنە شوعىرلاندىرىلاتىن بولادى»، - دەدى ول.
مۇنان بولەك ول رەسپۋبليكالىق جانە وڭىرلىك دەڭگەيلەردە مۋزەي قورلارىن سيفرلاندىرۋ جۇمىسى بەلسەندى جۇرگىزىلىپ جاتقانىن اتاپ ءوتتى.
«ءا. قاستەيەۆ اتىنداعى مەملەكەتتىك ونەر مۋزەيىندە 700 13 جادىگەر بىرلىگى سيفرلاندىرىلدى. ق ر ورتالىق مەملەكەتتىك مۋزەيىندە 602 39 بىرلىك سيفرلاندىرىلدى. قوستاناي وبلىسىندا ەكسپوناتتاردىڭ 24,5، اقتوبە وبلىسىندا - 23، اتىراۋ وبلىسىندا - 20، قاراعاندى وبلىسىندا - 19، اقمولا وبلىسىندا - 18، ماڭعىستاۋ وبلىسىندا - 14,8 پايىزى تسيفرلى فورماتقا كوشىرىلدى»، - دەدى بالايەۆا.