قيامەتكە دەيىن جاۋلاسىپ ءوتۋى مۇمكىن ەكى ەل
ولاي دەيتىنىمىز، اتالعان ەكى ەلدىڭ ەكونوميكالىق، دەموگرافيالىق، الەۋمەتتىك، ساياسي، ت. ب. فاكتورلاردى قاپەرگە العان كۇننىڭ وزىندە اسا ۇلكەن ايىرماشىلىعى جوق. وسى سەبەپتى، ءبىر-بىرىنە جەڭستىك بەرمەي وتەدى. سالىستىرمالى تۇردە ەكى ەلدىڭ دە الەۋەتى شامالاس، ءبىر-ءبىرىن الا المايدى.
دەسە دە ءازىربايجان وزىنەن حالقى دا از، ەكونوميكالىق مۇمكىندىگى دە شەكتەۋلى ارمەنيادان ءوزىنىڭ تاريحي مەكەنىن نەگە قايتارا الماي وتىر؟ ك س ر و ىدىراعان كەزدە ارمياندار كوپتەپ شوعىرلانعاندىقتان ارمەنيا قۇرامىندا قالىپ قويعان تاۋلى ايماقتى قايتارا الماۋى دا مۇمكىن. ويتكەنى، ارمەنيا ءبىر قاراعاندا جانجالدى شەشۋگە باعىتتالعانداي كورىنەتىن، الايدا، ورىندالۋى نەعايبىل شارتتاردى كولدەنەڭ تارتىپ، ىمىراعا كەلۋگە نيەتتى ەمەسىن اڭعارتىپ الدى.
ناقتىراق ايتقاندا، تاياۋدا، دالىرەگى، اقپان ايىنىڭ 12- كۇنى ارمەنيا پرەزيدەنتى سەرج سارگسيان ءازىربايجانداردىڭ شىندىقتان الىس ۇمىتتەن باس تارپايىنشا بۇل تارتىسقا نۇكتە قويىلمايتىنىن مالىمدەدى.
«ءازىربايجان زانگەزۋردى (ارمەنيانىڭ سۇيىنىك وبلىسى) باسىپ الۋ تۋرالى قيالدىڭ قۇشاعىنان شىقپايىنشا ءبىز جانجالدىڭ شەشىمىن تابىلۋىنان ءۇمىتىمىزدى ۇزەمىز»، - دەگەن ول: «وتكەن جىلدارى ءازىربايجاننىڭ اراداعى جانجالدى بەيبىت جولمەن شەشۋگە مۇمكىندىكتەرى كوپ بولدى. الايدا، ۋىسىنان شىعارىپ العان مۇمكىندىكتەرى ءۇشىن وكىنىش بىلدىرگەننەن باسقا قولىمىزدان كەلەر قايران جوق»، - دەپ كوسىلدى.
ارمەنيا باسشىسى بۇل مالىمدەمەسىن اقپاننىڭ 8- كۇنى ءازىربايجان پرەزيدەنتىنىڭ بيلىك باسىنداعى «جاڭا ءازىربايجان» پارتياسىنىڭ سەزىندە سويلەگەن سوزدەرىنە قارىمتا جاۋاپ بولدى. يلھام اليەۆ القالى جيىندا نە دەپ ەدى ءوزى؟ ول ۇلكەن مىنبەردەن ءوزى باسقارىپ وتىرعان ەلدىڭ ساياسي ءارى ستراتەگيالىق ماقساتتارى مەن مىندەتتەرىن اتاي كەلىپ، ءازىربايجانداردىڭ تاريحي جەرىن قايتارۋدىڭ ماڭىزدىلىعىنا تاعى ءبىر توقتالعان ەدى.
ونىڭ ايتۋىنشا، قازىرگى ارمەنيانىڭ وڭتۇستىك-باتىس جانە ورتالىق بولىگىندەگى ەرەۆان حاندىعىن، زانگەزۋردى جانە گوكشانى (ارمەنيانىڭ شىعىسىنداعى سيەۆان كولى) قايتارۋ تۋراسىندا ايتىپ قالدى. «مۇنى كەلەر ۇرپاعىمىز دا، كۇللى الەم دە ءبىلۋى ءتيىس. بىزدەر، ءازىربايجاندار تاريحي اتامەكەنىمىزگە ورالۋىمىز كەرەك. ءبىزدىڭ ەڭ باستى ساياسي ءارى ستراتەگيالىق ماقساتىمىز وسى»، - دەپ مالىمدەدى.
islam.kz