سالبۋرىن مەرەكەسى: قۇسبەگىلىك جانە ساياتشىلىق ونەر ناسيحاتتالدى

شىمكەنت. قازاقپارات - وڭتۇستىك قازاقستان وبلىسىنىڭ تۇلكىباس اۋدانىندا ساياتشىلىق ونەرىن ناسيحاتتايتىن ەتنوگرافيالىق تانىمدىق «سالبۋرىن - مەرەكە عوي ساياتشىعا...» شاراسى ءوتتى، دەپ حابارلايدى قازاقپارات ءتىلشىسى.

ەتنو-تانىمدىق شارانىڭ اشىلۋىندا ءسوز العان «الاش» حالىقارالىق سىيلىعىنىڭ لاۋرەاتى، بەلگىلى جازۋشى مارحابات بايعۇت ۇلتتىق سالت-ءداستۇرىمىز بەن ادەت-عۇرپىمىزدىڭ ۇرپاق تاربيەسى مەن قوعامداعى ءمانى جايىندا اڭگىمەلەدى.

ال ءوز كەزەگىندە، سالت-ءداستۇر ورتالىعىنىڭ ديرەكتورى جانىبەك ابدانبەك ۇلى مەن بەلگىلى ساياتشى مۇحتار اتاحان دا اتادان بالاعا مۇرا بولعان ءداستۇردىڭ ماڭىزدىلىعىنا توقتالدى.

شارا بارىسىندا بۇركىت باپتاۋ مەن قۇماي تازىلاردى اڭشىلىققا باۋلۋ، اڭعا سالۋ جايىندا وي- پىكىرلەر ايتىلدى. تاجىريبە جۇزىندە كورسەتىلدى. وڭتۇستىك وڭىرىنە بەلگىلى قۇسبەگى جومارت كەۋەنوۆ پەن ساياتشى مۇحتار اتاحان ءوز كاسىپتەرىنىڭ قىر-سىرى تۋرالى كەلۋشىلەرگە تىڭ ماعلۇمات بەرىپ، ساياتشىلىق ءداستۇر تۋرالى تولعاندىرعان سۇراقتارىنا جاۋاپ بەردى.