باكۋدە تۇركى ىنتىماقتاستىعى ۇيىمدارىنىڭ كەڭەسى ءوتتى
تۇركپا باس حاتشىسى التىنبەك مامايۋسۋپوۆ ءتوراعالىق ەتكەن كەلەلى كەزدەسۋگە تۇركى كەڭەسىنىڭ باس حاتشىسى راميل گاسانوۆ، تۇركسوي ۇيىمىنىڭ باس حاتشىسى دۇيسەن قاسەيىنوۆ، تۇركى مادەنيەتى جانە مۇراسى قورىنىڭ پرەزيدەنتى گيۋناي ەفەنديەۆا، تۇركى اكادەمياسىنىڭ تۇراقتى حاتشىسى اسحات كەسىكبايەۆ پەن ساراپشى ماماندار قاتىستى.
تۇركى ىنتىماقتاستىعى ۇيىمدارىنىڭ وكىلدەرى 2017 -جىلى اتقارعان قىزمەتتەرى تۋرالى، سونداي- اق 2018 -جىلعا جوسپارلانعان جوبالارى جونىندە مالىمەتتەر ۇسىندى. سونىمەن بىرگە، حاتشىلىقتار اراسىندا ۇيلەستىرۋ جۇمىستارىن جانە اقپارات الماسۋدى جەتىلدىرۋ تۋرالى ورتاق كەلىسىمگە كەلدى.
تاراپتار سونداي- اق، تۇركسوي- دىڭ 25 جىلدىعى، تۇركپا- نىڭ 10 جىلدىعى، ءا د ر- ءدىڭ 100 جىلدىعىنا جانە تۇركى الەمىنە ورتاق تانىمال قازاق اقىنى ماعجان جۇمابايەۆتىڭ 125 جىلدىعى مەن كورنەكتى قىرعىز جازۋشىسى شىڭعىس ايتماتوۆتىڭ 90 جىلدىعىنا وراي ءبىرقاتار ماڭىزدى ءىس- شارالاردى بىرلەسىپ ۇيىمداستىرۋعا كەلىستى.
جيىن سوڭىندا قاتىسۋشىلار كەلەسى V ۇيلەستىرۋ كەڭەسىن 2018 -جىلى ازەربايجاندا تۇركى مادەنيەتى مەن مۇراسى قورى وتكىزەتىنى تۋرالى شەشىم قابىلدادى.