قازاقستان ارزان بەنزين باعاسى بويىنشا الەمدە كوش باستادى
اتالعان تىزىمگە 33 مەملەكەت كىرگەن، ونىڭ ىشىندە قازاقستان دا بار، دەپ حابارلايدى قازاقپارات.
رەسەيلىك «ريا رەيتينگ» اگەنتتىنىڭ سايتىندا جاريالانعان دەرەكتەرگە سۇيەنسەك، قازاقستانداعى اي-95 بەنزينىنىڭ باعاسى جىلدىڭ باسىندا 176 تەڭگەنى قۇراعان. بۇل - تىزمدەگى ەلدەردىڭ ىشىندە ەڭ تومەن باعا كورسەتكىشى بولىپ سانالادى. ەكىنشى ورىندا - بەلارۋس (206,7 تەڭگە)، ءۇشىنشى - رەسەي (233 تەڭگە). ەڭ قىمبات اي-95 بەنزينىنىڭ باعاسى نيدەرلاندىدا (629 تەڭگە).
قازاقستاندا ءبىر جىلدىڭ ىشىندە اي-95 20,4 پايىزعا ءوسىپ كەتكەن. بۇل - رەيتينگكە قاتىسۋشى مەملەكەتتەر ىشىندەگى ەڭ جوعارعى جانە جىلدام كورسەتكىش. ەۋروپانىڭ 6 مەملەكەتىندە بەنزين باعاسىنىڭ ارزانداۋى بايقالسا، 3 مەملەكەتتە باعا ەشقانداي وزگەرىسكە ۇشىراماعان.
رەيتينگ ستاتيستيكاسىنا سايكەس، ەلىمىزدەگى ديزەل وتىنىنىڭ باعاسى 210 تەڭگە، بۇل بەلارۋس مەملەكەتىنەن كەيىنگى ەكىنشى ورىن (208 تەڭگە). قازاقستانداعى ديزەلدىڭ باعاسى ءبىر جىلدىڭ ىشىندە 25,8 پايىزعا وسكەن. جىلدىق ءوسىمدى انىقتايتىن بۇل رەيتينگتە دە ەۋروپالىق مەملەكەتتەردىڭ ەشقايسىسى ءبىزدىڭ الدىمىزعا تۇسە المادى.
رەيتينگتىڭ تاعى ءبىر كورسەتكىشى بويىنشا، قازاقستاندىق ازاماتتىڭ ورتاشا جالاقىسىنا 853,6 ليتر بەنزين ساتىپ الۋعا بولادى ەكەن. بۇل كورسەتكىش بويىنشا قازاقستان كەستەدە كەيىن قاراي جىلجىپ ورتاڭعى 16- ورىنعا جايعاستى. بۇل ولشەمدە كوش باستاپ تۇرعان ليۋكسەمبۋرگ تۇرعىندارى، ولار جالاقىلارىنا 471 تەڭگەدەن 2701 ليتر بەنزين ساتىپ الا الادى.