بەلارۋستەر اقمولالىقتارعا ماشينا جاساۋدىڭ تىڭ جوباسىن ۇسىنباق
اقمولا وبلىسىنىڭ اكىمى مالىك مىرزالين وڭىرگە جۇمىس ساپارىمەن كەلگەن بەلارۋس رەسپۋبليكاسىنىڭ ونەركاسىپ ءمينيسترى ۆيتالي ۆوۆك باستاعان ءبىر توپ بەلارۋستىق ىسكەر ازاماتتارمەن كەزدەستى.
كەزدەسۋدە ايماق باسشىسى اقمولا وبلىسىنىڭ بەلارۋس رەسپۋبليكاسىمەن دوستىق قاتىناسى ەرتەدەن باستاۋ الاتىنىن اتاپ ءوتتى.
«كوكشەتاۋ قالاسىندا اۋىل شارۋاشىلىعى جانە كوممۋنالدىق تەحنيكالار شىعاراتىن قازاقستان- بەلارۋس يندۋستريالىق- تەحنولوگيالىق پاركى «قازاقستاندىق اگرو يننوۆاتسيالىق كورپوراتسياسى» جاۋاپكەرشىلىگى شەكتەۋلى سەرىكتەستىگىنىڭ قۇرىلۋى وسىنىڭ ايقىن مىسالى»، - دەدى مالىك مىرزالين ءوز سوزىندە.
تاراپتار ونەركاسىپتىك كووپەراتسيانى ودان ءارى دامىتۋ، اۋىل شارۋاشىلعى تەحنيكالارىنىڭ جاڭا تۇرلەرىن شىعارۋ، سونداي-اق، كەلەشەكتە بەلارۋستىڭ «ماز»، «م ت ز»، «بوبرۋيسكاگروماش»، «بەلاز»، «گومسەلماش» ءتارىزدى اشىق اكسيونەرلىك قوعامدارى شىعاراتىن اۆتوبۋستاردى اقمولا وبلىسىندا دا قولدانۋ جانە ولاردى جەتكىزۋ مەن سەرۆيستىك قىزمەت كورسەتۋ مۇمكىندىكتەرىن تالقىلادى.
ءوز كەزەگىندە ۆيتالي ۆوۆك مىرزا دا جىلى قارسى العان ايماق باسشىسىنا العىسىن ءبىلدىرىپ، ەكىجاقتى ارىپتەستىك قاتىناستى دامىتۋدىڭ ماڭىزدىلىعىنا توقتالدى.
«ءبىزدىڭ قازاقستان نارىعىندا جۇمىس ىستەگەمىز كەلەدى. بەلارۋس تاۋارلارىن ساتىپ قانا قويماي، وسى جاقتان دا شيكىزات سياقتى قاجەتتى وزىمىزدە جوق ونىمدەردى ساتىپ الۋعا نيەتتىمىز. اقمولا وبلىسى ونەركاسىپتىك جانە اگرارلى وبلىس بولعاندىقتان، ءتۇرلى سالالار بويىنشا بىرلەسىپ جۇمىس ىستەۋگە مۇمكىندىك مول. اسىرەسە، ەكى ەل اراسىندا ساۋدا- ەكونوميكالىق، كولىكتىك، مادەني- گۋمانيتارلىق سالالاردا جۇزەگە اسىرىلماي جاتقان الەۋەتتى جوبالار بار. ونىڭ ىشىندە اقمولا وبلىسىمەن بىرلەسىپ، ماشينا جاساۋ سالاسىندا تىڭ جوبانى جۇزەگە اسىرۋعا نيەتتىمىز»، - دەدى ۆيتالي ۆوۆك.
ساپار اياسىندا مەيماندار الدىمەن كوكشەتاۋ قالاسىنىڭ سولتۇستىك ونەركاسىپ ايماعىندا جاڭادان قۇرىلعان اۋىل شارۋاشىلىعى جانە كوممۋنالدىق تەحنيكالار شىعاراتىن قازاقستان- بەلارۋس يندۋستريالىق- تەحنولوگيالىق پاركى «قازاقستاندىق اگرو يننوۆاتسيالىق كورپوراتسياسى» جاۋاپكەرشىلىگى شەكتەۋلى سەرىكتەستىگىندە بولدى. بىرلەسىپ قولعا الىنعان جوبانىڭ جۇزەگە اسىرىلۋ بارىسىمەن جاقىن تانىسىپ، ودان ءارى دامىتۋ جولدارىن قاراستىردى. قازىر تراكتورلاردان بولەك جۇك كولىكتەرى مەن ارنايى ماقساتتاعى ماشينالاردىڭ دا بىرنەشە ءتۇرى شىعارىلۋدا.
ايتا كەتەيىك، وتكەن جىل قورىتىندىسى بويىنشا، اقمولا وبلىسى مەن بەلارۋس رەسپۋبليكاسى اراسىنداعى تاۋار اينالىمى الدىڭعى جىلمەن سالىستىرعاندا ەكى ەسەگە وسكەن.