استانا ارلانس پەن ءۇندىستاندىق بوكس كومانداسىنىڭ ايقاسى قاشان وتەتىنى انىقتالدى
كوماندانىڭ باسپا ءسوز قىزمەتى تاراتقان مالىمەتكە سايكەس، وسى ماۋسىمداعى ارلاندىقتاردىڭ العاشقى قارسىلاسى جوباعا ءبىرىنشى رەت قاتىسىپ وتىرعان ءۇندىستاندىق «Indian Tigers» كومانداسى بولماق. كەزدەسۋ 10 -اقپان كۇنى قاراعاندىداعى سەرىك ساپيەۆ اتىنداعى بوكس ورتالىعىندا وتەدى. ال ودان ءبىر كۇن بۇرىن اتالعان ورتالىقتا بوكسشىلاردىڭ سالماقتارى ولشەنىپ، ب ا ق وكىلدەرىنە ارنالعان باسپا ءسوز ءماسليحاتى ۇيىمداستىرىلادى.
جاڭا ماۋسىمدا دوداعا 11 كوماندا قاتىسادى. كوماندالار قۇرلىقتار بويىنشا ءۇش توپقا بولىنگەن. جەرەبە تارتۋ ءراسىمى بويىنشا «استانا ارلاندارى» ازيا ايماعىنداعى توپتا قىتايدىڭ «China Dragons»، ءۇندىستاننىڭ «Indian Tigers» جانە رەسەيدىڭ «Patriot Boxing Team» كوماندالارىمەن كەزدەسەدى.
ال امەريكا قۇرلىعى بويىنشا كۋبا، ۆەنەسۋەلا، وزبەكستان جانە كولۋمبيا ءوزارا مىقتىنى انىقتاسا، ەۋروپا قۇرلىعى اراسىندا حورۆاتيا، فرانسيا، انگليا جانە يتاليا قۇرامالارى ءوزارا سىنعا تۇسەدى. سوڭىندا ءار قۇرلىقتىڭ جەڭىمپازدارى ناعىز چەمپيوندى انىقتايدى.
ەستەرىڭىزگە سالا كەتەيىك، «استانا ارلاندارى» - WSB جوباسىندا ءۇش رەت جەڭسە، ءتورت رەت كۇمىس جۇلدەگەر اتاندى. ەكى رەت كۋبالىق بوكسشىلار توپ جارسا، فرانسيا مەن يتاليا كوماندالارى ءبىر-ءبىر رەتتەن جەڭىسكە جەتتى.
ايتا كەتەيىك، كەشە عانا وليمپيادا چەمپيونى باقتيار ارتايەۆ «Astana Arlans» كاسىپقوي بوكس كلۋبىنىڭ ديرەكتورى بولىپ تاعايىندالعان بولاتىن.
اۆتور: مارلان جيەمباي