تۇركيادا شىعاتىن جۋرنال ءبىر سانىن قازاق اقىنىنا ارنادى
قازاقستان پرەزيدەنتى نۇرسۇلتان نازاربايەۆتىڭ «ءتورتىنشى ونەركاسىپتىك ريەۆوليۋتسيا جاعدايىنداعى دامۋدىڭ جاڭا مۇمكىندىكتەرى» اتتى جولداۋى مەن «بولاشاققا باعدار: رۋحاني جاڭعىرۋ» باعدارلاماسى اياسىندا قازاقستاننىڭ تۇركياداعى ەلشىلىگىنىڭ قولداۋىمەن، ەۋرازيا جازۋشىلار قاۋىمداستىعىنا قاراستى «كارداش كالاملەر» جۋرنالىنىڭ اقپان ايىنداعى سانى مادەنيەت سالاسىنىڭ ۇزدىگى، اقىن ەسەنقۇل جاقىپبەكتىڭ شىعارماشىلىعىنا ارنالدى.
جۋرنالعا اقىننىڭ كوزى تىرىسىندە جازعان «ءومىرىمدى ولەڭسىز ەلەستەتە المايمىن»، ماقالاسى مەن قازاقستاننىڭ تۇركياداعى ەلشىسى ابزال ساپاربەك ۇلىنىڭ ء«تاڭىر تاۋدىڭ داۋىسى»، ەۋرازيا جازۋشىلار قاۋىمداستىعىنىڭ ءتوراعاسى ياكۋب وماروعلىنىڭ «ماحابباتتى سۇيگەن اقىن» جانە اقىن اتامان كالەبوزون حانىمنىڭ «ولەڭ، ولەڭ، ولەڭمىن مەن» دەپ جىرلايدى ەسەنقۇل جاقىپبەك»، ۇلتتىق سپورت تۇرلەرى قاۋىمداستىعىنىڭ قۇرمەتتى پرەزيدەنتى، گەنەرال-مايور قايرات ساتىبالدى ۇلىنىڭ «ەلىن سۇيگەن، ەلى سۇيگەن اقىن»، جازۋشى ناعاشىبەك قاپالبەك ۇلىنىڭ «اقىن ەسەنقۇل»، اقىن كادىربەك قۇنىپيا ۇلىنىڭ «ماڭگىلىك ءىز» اتتى ماقالالارى ەنگەن.
سونداي-اق، باسىلىمعا ەسەنقۇل جاقىپبەكتىڭ توپتاما ولەڭدەرى مەن فوتوشەجىرەلەرى ەندى. ماتەريالداردى تۇرىك تىلىنە اۋدارىپ، دايىنداعان ديپلومات-جازۋشى مالىك وتاربايەۆ.
ەسەنقۇل جاقىپبەكوۆ - 1954-جىلى 10- اقپاندا الماتى وبلىسى، جامبىل اۋدانىنداعى بىرلىك اۋىلىندا تۋعان. ەڭبەك جولىن مەكتەپ بىتىرگەن سوڭ اۋداندىق گازەت رەداكتسياسىندا باستادى. قازاق مەملەكەتتىك ۋنيۆەرسيتەتىنىڭ جۋرناليستيكا فاكۋلتەتىن بىتىرگەن.
ول ۇلى جامبىلدىڭ جىراۋلىق مەكتەبىنىڭ لايىقتى تۇلەگى، كورنەكتى وكىلدەرىنىڭ ءبىرى رەتىندە جاستايىنان-اق ەلگە كەڭىنەن تانىلدى. ايتىس الامانىندا وتىز جىلدان استام ۋاقىت تەر توگىپ، تەليەۆيزيالىق ايتىستىڭ تۇڭعىش جەڭىمپازى اتاندى. ەسەنقۇل جاقىپبەكتىڭ ءاسيا بەركەنوۆا، اسەلحان قالىبەكوۆا جانە قىرعىز اقىنى ءاشىرالى ايتاليەۆپەن بولعان ءسوز سايىستارى ايتىستىڭ كلاسسيكالىق ۇلگىسى رەتىندە ەستە قالدى. قالام مەن دومبىرانى تەڭ ۇستاعان اقىن كوپ جىلدان بەرى ونەرلى جاس جەتكىنشەكتەرگە ءدارىس بەرىپ، قاناتتارىنىڭ قاتايۋىنا زور ۇلەس قوستى. ءومىرىنىڭ سوڭعى جىلدارىندا العاشقى جىرلارىن وقىرمانعا جاريا ەتكەن اۋداندىق «اتامەكەن» گازەتىنىڭ باس رەداكتورى بولدى. سانالى عۇمىرىن ادەبيەت، جۋرناليستيكا سالاسىن دامىتۋعا ارناپ، ۇلتجاندى، نامىسشىل، ماماندىعىنا ادال جان ەكەندىگىن دالەلدەدى.
«قارلىعاش»، «باستاۋ»، «ءبىز ەكەۋمىز»، «اعىمنان جارىلامىن»، «جەرگە تابىن»، «جانقيسسا»، «ەسىل دۇنيە-اي»، «ءبىزدىڭ ەلدىڭ جىگىتتەرى»، «بۇل جاز دا وتەر»، «جەتىسۋ جىرلايدى»، «سارعايعان سارى تەرەزە»، «تاۋ باسىندا كارى قار»، «تازقارا قۇستىڭ تاعدىرى» سىندى وننان اسا كىتاپتارى وقىرمان جۇرەگىنەن جول تاپقان. ەكى جۇزگە جۋىق ولەڭدەرىنە ءان جازىلدى. «قارا كۇز»، «الداي-اۋ»، «جۇلدىزدار ءبارىن بولجايدى»، «تۇماندى كۇن» سياقتى جيىرماعا جۋىق ءان شىعارعان كومپوزيتورلىق قىرى دا حالىق اراسىنا كەڭىنەن تاراعان.
قازاقستان جازۋشىلار وداعىنىڭ مۇشەسى، مادەنيەت سالاسىنىڭ ۇزدىگى، پرەزيدەنت ستيپەندياسىنىڭ، ءبىرجان سال اتىنداعى سىيلىقتىڭ يەگەرى، «قازاقستان رەسپۋبليكاسىنىڭ تاۋەلسىزدىگىنە - 10 جىل»، «ەرەن ەڭبەگى ءۇشىن»، «استانا قالاسىنا - 10 جىل»، «قازاقستان رەسپۋبليكاسىنىڭ تاۋەلسىزدىگىنە - 20 جىل» مەرەكەلىك مەدالدارىمەن ماراپاتتالعان.