قازاقستان مەن ا ق ش پرەزيدەنتتەرىنىڭ مىنەزدەرى ۇقسايدى - ەلشى دجوردج كرول

استانا. قازاقپارات - قازاقستان پرەزيدەنتى نۇرسۇلتان نازاربايەۆ پەن ا ق ش پرەزيدەنتى دونالد ترامپتىڭ مىنەزدەرى ۇقسايدى.

بۇل تۋرالى بۇگىن ەلباسى نۇرسۇلتان نازاربايەۆتىڭ ۆاشينگتونعا رەسمي ساپارىنىڭ قورىتىندىسىنا وراي ب ا ق وكىلدەرىنىڭ ساۋالىنا جاۋاپ بەرگەن ا ق ش- تىڭ قازاقستانداعى توتەنشە جانە وكىلەتتى ەلشىسى دجوردج كرول ايتتى، دەپ حابارلايدى قازاقپارات.

«ساپار بارىنشا تابىستى ءوتتى. اسىرەسە پرەزيدەنتتەر اراسىنداعى جەكە بايلانىستار ايرىقشا بولدى دەپ سانايمىن. كەزدەسۋلەرگە قاتىسىپ، ولاردىڭ دوستىق پەيىلدە عانا ەمەس ادامي تۇرعىدا دا جاقىن بولعانىن بايقادىم. ءبىزدىڭ پرەزيدەنتتەرىمىزدىڭ مىنەزدەرى سايكەس كەلەدى. ترامپ پرەزيدەنت نازاربايەۆقا ايرىقشا قۇرمەت كورسەتتى. ارينە، ولار ءبىر-بىرىمەن قالجىڭداستى دا، جىلى قابىلداۋ بولدى. مۇنىڭ بارلىعى دا بايقالىپ تۇردى. ءتىپتى اڭگىمەلەسۋدىڭ ءوزى 1,5 ساعاتقا سوزىلدى. ال كەستە بويىنشا 45 مينۋت ءوتۋى ءتيىس ەدى. ويتكەنى، اڭگىمەلەسۋ قىزىقتى ءوتتى. اق ۇيدەن كەيىن ۆيتسە-پرەزيدەنتپەن وتكەن تاڭعى اس تا شاعىن فورماتتا دوستىق پەيىلدە بولدى»، - دەدى دجورد كرول.

ونىڭ اتاپ وتۋىنشە، بۇل ساپار ەكى ەلدىڭ ۇكىمەتتەرى اراسىندا عانا ەمەس سونىمەن بىرگە كوشباسشىلارى اراسىنداعى قارىم-قاتىناستى دامىتۋعا تىڭ سەرپىن بەرەدى.

«مەن ءۇشىن بۇل ساپار ەلشىلىكتەگى جۇمىستىڭ كوپ بولاتىندىعىن بىلدەرەدى. ارينە، ۆاشينگتونداعى قازاقستان ەلشىلىگىنىڭ دە جۇمىس كولەمى ۇلعايا تۇسەرى ءسوزسىز»، - دەدى ەلشى.

ايتا كەتەيىك، 17- قاڭتاردا اق ۇيدە قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆ امەريكا قۇراما شتاتتارىنىڭ پرەزيدەنتى دونالد ترامپپەن كەزدەستى. كەزدەۋدەن كەيىن ەكى ەلدىڭ باسشىلارى ب ا ق وكىلدەرىنە بىلەسكەن مالىمدەمە جاسادى.

اۆتور: مارلان جيەمباي