قىزىلوردا وبلىسىندا سمارتفون اينەكتەرى شىعارىلماق

بەيجىڭ. قازاقپارات -  قىزىلوردادا سمارتفوندار مەن گادجەتتەرگە ارنالعان ۋلتراجۇقا اينەكتەر شىعارۋ جوسپارلانۋدا.

بۇل تۋرالى قىتاي ەلىنە ساپارىنىڭ قورىتىندىسى بويىنشا جۋرناليستەرمەن كەزدەسكەن  قىزىلوردا وبلىسىنىڭ اكىمى قىرىمبەك كوشەربايەۆ ايتتى، دەپ حابارلادى قازاقپاراتتىڭ قىتاي ەلىندەگى ءتىلشىسى.

بۇگىندە قۇرىلىسى ءجۇرىپ جاتقان تومپاناجدى سەمەنت زاۋىتى بيىلعى جىلدىڭ جەلتوقسان ايىندا پايدالانۋعا بەرىلەدى. ال، شىنى زاۋىتى استانا كۇنى مەرەكەسى قارساڭىندا ىسكە قوسىلماق.

«قىزىلوردا وبلىسىنىڭ دەلەگاتسياسى قىتاي ەلىندە ءىرى ينۆەستيتسيالىق كومپانيا وكىلدەرىمەن كەزدەستى. جوعارى تەحنولوگيالىق التى جوبا بويىنشا كەلىسىمگە كەلدىك. مىسالى، شىنى زاۋىتىنىڭ ەكىنشى كەزەڭى قولعا الىنىپ، سمارتفوندار، پلانشەتتەر مەن گادجەتتەرگە ارنالعان ۋلتراجۇقا شىنىلار شىعارامىز. بۇل قازاقستان ەكونوميكاسى ءۇشىن اسا ماڭىزدى»، - دەدى ق. كوشەربايەۆ.

اكىمنىڭ ايتۋى بويىنشا، كەلىسىلگەن جوبالاردى ىسكە اسىرۋ ءۇشىن ەكىجاقتى جۇمىس توبى قۇرىلعان. الداعى ۋاقىتتا ناقتى كەلىسىمدەرگە قول قويىلماق. سونداي-اق، شىنجىن قالاسىندا «Huaweى» كومپانياسىمەن «اقىلدى قالا» جوباسى بويىنشا مەموراندۋمعا قول قويىلادى. بۇل كومپانيا بۇگىندە الەمگە جاقسى تانىمال. وسىنداي «اقىلدى قالا» جوباسىنا سىرداريانىڭ سول جاعالاۋىندا بوي كوتەرىپ جاتقان قالا دا ەنەتىن بولادى.

ەستەرىڭىزگە سالا كەتەيىك، ق. كوشەربايەۆ قىتايلىق CNEEC كومپانياسىن سىر ەلىنە شاقىرعان بولاتىن. كۇن جانە گيدروەلەكترستانسياسى مەن قوقىس وڭدەۋ زاۋىتىن سالۋ بويىنشا جوبالاردى ىسكە اسىرۋ، سونىمەن بىرگە «اقىلدى قالا» جۇيەسىن دامىتۋ ءۇشىن قىتايلىق كومپانيا سىر ەلىنە كەلۋى مۇمكىن.

اكىم قىتايلىق China Triumph International Engineering Co, Ltd, مەن «Gezhouba Group Cement Co.، Ltd.»  كومپانيالارىنىڭ باسشىلارىمەن كەلىسسوزدەر جۇرگىزدى.