اقپاندا تەڭگە باعامى قانداي بولادى
اقپان ايىندا دوللار باعامىنىڭ قاي باعىتقا قاراي قوزعالاتىنىن قارجى نارىعىنىڭ ساراپشىسى، Halyk Finance باسقارماسىنىڭ مۇشەسى مۇرات تەمىرحانوۆ ايتىپ بەردى، دەپ حابارلايدى «قازاقپارات» ح ا ا.
مۇرات تەمىرحانوۆ krisha.kz سايتىنا بەرگەن سۇحباتىندا اتاپ وتكەندەي، قازىر تەڭگە باعامىندا ۇلكەن ءبىر وزگەرىس بولىپ جاتىر دەۋگە كەلمەيدى.
«ارينە، مۇناي باعاسىنىڭ 70 دوللارعا كوتەرىلۋى تەڭگەنىڭ قىمباتتاۋىنا اسەر ەتتى. قازىر تەڭگە دە رۋبل دە مۇنايدىڭ باعاسىنا قاراي وزگەرىسكە ۇشىراپ وتىر. وتكەن اپتانىڭ اياعىندا ءبىر دوللار ءۇشىن باعام 320-دان ءسال تومەن بولدى. بۇل - مۇناي باعاسىنىڭ نەگىزىندەگى ءوسىم. بۇگىنگى تەڭگەنىڭ ءسال السىرەۋى جانە كوتەرىلۋى 5 تەڭگەنىڭ ارعى- بەرگى جاعىندا بولادى. بۇل - قالىپتى نارىقتىق وزگەرىس.
وتكەن جىلى مۇناي باررەلى 56 دوللارعا تۇسكەندە ا ق ش ۆاليۋتاسى 320-330 تەڭگەنىڭ اينالاسىندا بولدى. ءبىز بۇل جەردە قازاقستانداعى جىلدىق 7 پايىز ينفلياتسيانى دا ەسەپكە الۋىمىز كەرەك. قاتەلەسپەسەم اقش- تاعى جىلدىق ورتاشا ينفلياتسيا كولەمى 1 پايىزدىڭ اينالاسىندا. دەمەك باررەل باعاسى قالىپتى ءبىر دەڭگەيدە ساقتالىپ تۇرسا دا، جىلدىڭ باسى مەن اياعىندا تەڭگە ءبارىبىر السىرەيدى دەگەن ءسوز»، - دەيدى ول.
ساراپشىنىڭ اتاپ وتۋىنشە، بۇگىن رەسەيگە سانكسيا سالىنادى دەپ كۇتىلەدى. وسىعان بايلانىستى اقپاندا رۋبل السىرەۋى مۇمكىن. ارينە، بۇل تەڭگەگە دە اسەر ەتەدى. ياعني، وسى نە باسقا سەبەپتەرگە بايلانىستى رۋبل 20 پايىزعا قۇنسىزدانسا، تەڭگە 7-10 پايىزعا السىرەيدى.
«سونداي-اق ۇلتتىق ۆاليۋتانىڭ قۇنسىزدانۋىنا مۇناي باررەلىنىڭ قايتا ارزانداۋى دا اسەر ەتۋى مۇمكىن. قارا التىننىڭ قۇنىنا قاتىستى ءبىز كوپ جاعدايدا Bloomberg بولجامدارىنا سۇيەنەمىز. ولار 70 دوللاردى تىم قىمبات دەپ وتىر. الداعى ۋاقىتتا ورتاشا ەسەپپەن نارىقتاعى باعا 62 دوللاردىڭ توڭىرەگىندە بولۋى كەرەك دەپ كۇتىلەدى.
تاعى دا ايتا كەتەيىن، مۇناي باررەلىنىڭ 60 دوللاردان اسۋى ءبىزدىڭ ەكونوميكامىز ءۇشىن ءتاپ- ءتاۋىر باعا. مۇنداي سەناري بويىنشا جۇرە بەرسە تەڭگە باعامىندا ايتارلىقتاي وزگەرىستەر بولمايدى، بيۋدجەتتىڭ دە جاعدايى جاقسى بولادى. اتالعان بولجامدارعا سايكەس اقپانداعى ءتول ۆاليۋتامىزدىڭ دوللارعا شاققانداعى قۇنى 320 تەڭگەنىڭ ماڭايىندا بولادى»، - دەدى مۇرات تەمىرحانوۆ.