مەنىڭ عانا جولىم دۇرىس دەيتىندەر ءداستۇرلى يسلامعا ورالا باستادى - باس ءمۇفتي
«قازاقستان مۇسىلماندارى ءدىني باسقارماسى راديكالدى، دەسترۋكتيۆتى تەرىس اعىمدارمەن جۇمىستى بەلسەندى جۇرگىزىپ كەلە جاتىر. 2017 -جىلى دەسترۋكتيۆتى كوزقاراستان كەرى قايتقان، سانالى تۇردە ءوزىمىزدىڭ ءداستۇرلى يسلام تانىم- تۇسىنىگىمىزگە ورالعان مىڭعا تارتا ازاماتتىڭ اتىن دا ايتا الامىز. بۇل ءوز كەزەگىندە ناتيجەلى جۇمىس بار ەكەنىن بىلدىرەدى. ءبىز وسى جۇيەلى جۇمىستى جاساۋ باعىتتارىندا بەلسەندىلىك تانىتپاعان وڭىرلەرمەن، مەشىتتەرمەن جاڭا جۇمىس جۇيەسىن باستاپ كەلەمىز»، - دەپ اتاپ ءوتتى باس ءمۇفتي پارلامەنت ماجىلىسىندە.
بۇدان بۇرىن حابارلانعانداي، بۇگىن ماجىلىستە «ق ر كەيبىر زاڭنامالىق اكتىلەرىنە ءدىني قىزمەت جانە ءدىني بىرلەستىكتەر ماسەلەلەرى بويىنشا وزگەرىستەر مەن تولىقتىرۋلار ەنگىزۋ» تۋرالى زاڭ جوباسىن تانىستىرىلدى. وسى ورايدا زاڭ جوباسىنا العاش رەت «دەسترۋكتيۆتى ءدىني اعىم» جانە «ءدىني راديكاليزم» سياقتى ۇعىمداردىڭ زاڭدى انىقتاماسى ەنگىزىلىپ وتىر.
«دەسترۋكتيۆتى ءدىني اعىم» جانە «ءدىني راديكاليزم» ماسەلەسى قوعامدا اسا ماڭىزدى. ءبىزدىڭ بولمىسىمىزدى، ءداستۇرىمىزدى، مادەنيەتىمىزدى، ياعني بارشا قۇندىلىعىمىزدى جوققا شىعاراتىن تۇسىنىك كوزقاراس بولسا، دەمەك ول - دەسترۋكتيۆتىڭ انىقتامالىعى. ال ەندى تەك «مەنىڭ عانا جولىم دۇرىس، باسقانىڭ بارلىعى دىندە ەمەس، مۇسىلمان ەمەس» دەپ جۇرتشىلىقتى اشىق ايىپتايتىن بولسا، وندا ول - راديكالدى كوزقاراس. دەمەك، وسىنداي جاقتارىن نەگىزگە الا وتىرىپ، ءدىني قىزمەتىمىزدىڭ جۇمىسىندا كوپ جەڭىلدىك تانىتادى دەپ ويلايمىن»، - دەپ تۇيىندەدى ءسوزىن سەرىكباي قاجى وراز.
اۆتور: رۋسلان عابباسوۆ