راكپەن اۋىراتىن تريستين ستيۋارتتىڭ ارمانى فۋتبول ويناۋ بولعاندىقتان دارىگەرلەر وسىنداي تاۋەكەلگە بارعان.
بۇل تۋرالى The Sun جازدى.
تريستين ستيۋارتتىڭ 12 جاسىندا اياعى اۋىرا باستاعان. 2016-جىلعا دەيىن دارىگەرلەر سەبەبىن تۇسىنبەي كەلگەن. كەيىن ونىڭ اياعىنا ارتىق بۇلشىق ەتتەر ءوسىپ كەتكەنى بەلگىلى بولدى.
2017-جىلى اقپاندا اياعىنداعى بۇلشىق ەتتەرىن الىپ تاستاعاننان كەيىنگى تەكسەرىستەن قاتەرلى ىسىك اۋرۋى انىقتالعان.
ماۋسىمدا تريستين ستيۋارتقا سينوۆيالدىق ساركوما دەپ اتالاتىن جۇمساق تىندىك قاتەرلى ىسىكتىڭ اگرەسسيۆتى ءتۇرى دەگەن دياگنوز قويىلدى.
«تريستيان بارلىق تەكسەرۋدەن ءوتىپ ءجۇردى. ونىڭ اياعىنا امپۋتاتسيا جاسايدى دەگەندە وتە قيىن بولدى. ول ۇنەمى بەلسەندى بولىپ جۇرەتىن، ەندى سپورتسىز ءومىرىنىڭ قانداي بولاتىنىن ەلەستەتە دە المايدى»، - دەيدى اناسى مەندي ستيۋارت.
دارىگەرلەر بالانىڭ سپورتقا دەگەن ماحابباتىن ەسەپتەي وتىرىپ، ونىڭ اياعىنا بالامالى امپۋتاتسيا جاساۋعا - اينالمالى پلاستيك سالۋعا تاۋەكەل ەتتى.
اينالمالى پلاستيك 180 گرادۋسقا دەيىن اينالىپ، قوزعالادى.
«تريستين 2 اپتا ويلانىپ، وتا جاساۋعا كەلىسىم بەردى. ول امپۋتاتسيادان كەيىن ەكى اياعىمنان دا ايىرىلىپ قالامىن دەپ قورىقتى»، - دەيدى اناسى.
دەگەنمەن بارلىعى ويداعىداي اياقتالدى. 2018-جىلدىڭ قاڭتارىندا تريستين ەشتەڭەنىڭ كومەگىنسىز ءجۇرۋدى ۇيرەندى. ونىڭ ەندىگى ماقساتى - جۇگىرۋدى ۇيرەنۋ.
«قازىر ونىڭ جاسى 15 تە. تريستيننىڭ جۇگىرىپ كەتۋى ءۇشىن پروتەزگە اقشا جيناپ جاتىرمىز. ونىڭ ەندىگى ارمانى - فۋتبولدان پاراليمپيادا ويىندارىنا قاتىسۋ»، - دەيدى تريستيننىڭ اناسى.