«رۋحاني جاڭعىرۋ» باعدارلاماسى اياسىندا قولعا الىناتىن جوبانىڭ ماقساتى - حالقىمىزدىڭ ۇلتتىق اڭشىلىق ءداستۇرىن كەڭىنەن ناسيحاتتاۋ. ماڭعىستاۋدا قازاقتىڭ اڭشىلىق ونەرىن دارىپتەپ جۇرگەن ساياتشىلار كوپ. جىل سايىن ولارمەن بىرگە قانسونارعا تۋريستەردىڭ، ولكەنتانۋشىلار مەن بلوگەرلەردىڭ اتتانۋى داستۇرگە اينالعان.
تالعات يسلام ۇلى، ءتىلشى:
- مەنىڭ قولىمداعى بۇركىتتىڭ ەسىمى اقسەڭگىر. جاسى 2-دە. يەسىنىڭ ايتۋىنشا قۇستى باپتاۋ 40-45 كۇنگە سوزىلادى. ال قانسوناردان ەكى تاۋلىك بۇرىن قان مەن جىنى سۋمەن شايىلىپ، سولىنەن ايىرىلعان قۇنارسىز ەت بەرىلەدى. مۇنان سوڭ تۇلكىنىڭ تۇلىپ تەرىسىنە جىبەرىلەدى. تۇلكىنىڭ تۇلىپ تەرىسىن حالقىمىز «شىرعا» دەپ اتايدى. ادەتتە شىرعاعا جاسقانباي تۇسكەن بۇركىت اڭدى ەركىن الادى دەگەن سەنىم قالىپتاسقان. تۇلكى، ءشيبورى ءىلىپ جۇرگەن اقسەڭگىردىڭ بالا قاسقىر الۋعا دا شاماسى جەتەدى.
ەكى جاسار تىرنەك بۇركىتتى تاجىريبەلى قۇسبەگى مەرەكە وتەعالي ۇلى باپتايدى. ول اڭشىلىقتىڭ وسى تۇرىمەن 6 جىلدان بەرى شۇعىلدانىپ كەلەدى. قازىر اۋىل كاسىپكەرلەرىنىڭ كومەگىمەن بۇركىتشىلەر مەكتەبىن اشۋعا دايىندىق ۇستىندە.
مەرەكە وتەعالي ۇلى، قۇسبەگى:
- اڭشىلىقتىڭ قۇس سالۋ ونەرىن ناسيحاتتاپ ءجۇرمىن حالىقتىڭ اراسىندا. قازىرگى تاڭدا 5-6 بۇركىتشى بارمىز. جاقسى، شۇكىر جارىستارعا بارىپ ءجۇرمىز. تۋريستەر كەلگەندە الىپ شىعىپ، وسىنداي ساياتشىلىققا شىقساق دەگەن نيەتتەمىز. مەكتەپ اشقىم كەلەدى.
بيىلدان باستاپ، وڭىرگە ات باسىن بۇرعان تۋريستەر ءۇشىن ساياتشىلاردىڭ ويىن- ساۋىق شارالارىن كەڭ كولەمدە ۇيىمداستىرۋ جوسپاردا بار.
قۇرالاي ىزىمبەرگەنوۆا، «وتپان» تاريحي- مادەني كەشەنىنىڭ قىزمەتكەرى:
- بۇرىنعى كەزدە ءداستۇر بويىنشا اڭشىلارمەن بىرگە ونەرپازدار دا شىعاتىن بولعان ەكەن. اڭشىنىڭ ءانىن ايتىپ، كۇيىن تارتىپ سودان كەيىن بارىپ اڭشىلارىمىز جولعا ءتۇسىپ كەتسە كەرەمەت بولار ەدى. مۇنى ۇيىمداستىرۋدى جوسپارلايتىن بولامىز.
اۋىلدا اشىلاتىن بۇركىتشىلەر مەكتەبى جىل ون ەكى اي جۇمىس ىستەيتىن بولادى. ءدارىس الۋشىلار جاز مەزگىلىندە اڭشىلىقپەن قاتار بىرنەشە كۇندىك تانىمدىق ەكسكۋرسيالارعا دا قاتىسادى.
www.24.kz