سالتاناتتى شارا بارىسىندا ءسوز سويلەگەن تۇركيا ءمينيسترى كاستامونۋ قالاسىنىڭ تۇركى دۇنيەسىندەگى ورنى ايرىقشا ەكەنىن اتاپ ءوتتى.
«كاستامانۋ تۇركى الەمىنىڭ استاناسى بولىپ جاتقان تۇستا سىزدەرمەن جۇزدەسكەنىمە قۋانىشتىمىن. بۇل شارا ارقىلى كورىكتى دە تاريحي مادەني قالانىڭ جاڭا تىنىسى اشىلادى دەپ ويلايمىن. بۇل مارتەبە قالانىڭ ابىرويىن ارتتىرادى دەپ ويلايمىن. وسى ىسكە ۇلەس قوسقان بارلىق ازاماتتارعا، تۇرىكسوي ۇيىمىنىڭ باس حاتشىسى دۇيسەن قاسەيىنوۆكە العىس بىلدىرەمىن. مۇندا جىل بويى باۋىرلاس حالىقتاردى جاقىنداستىرۋعا، مادەنيەتىن دامىتۋعا باعىتتالعان ءتۇرلى شارالار وتەتىن بولادى. وعان مينيسترلىك تاراپىنان ەرەكشە قولداۋ جاسالاتىن بولادى»، - دەدى نۋمان كۋرتۋلمۋش.
سونداي-اق، ول كاستامونۋدىڭ مۇنداي قۇرمەتكە بۇرىننان لايىق ەكەندىگىن ايتتى.
«بۇل شاھاردىڭ تاريحى تەرەڭ، ەجەلدەن تۇركى عۇلامالارىنىڭ مەكەنى. ورتا ازياداعى ۇلى ويشىل قوجا احمەت ياساۋيدەن جەتكەن ءىلىم انادولى دالاسىن قاسيەتتى مەكەنگە اينالدىردى. بۇل مەكەندى قورعاۋعا باتىرلارىمىز بەن بابالارىمىزدىڭ رۋحى مەن ءىلىمى دەم بەردى»، - دەپ اتاپ ءوتتى نۋمان كۋرتۋلمۋش.
ەسكە سالا كەتەيىك، تۇركيانىڭ كاستامونۋ قالاسىندا 2018-جىلعى تۇركى دۇنيەسىنىڭ مادەني استاناسى بولىپ جاريالانۋىنا بايلانىستى سالتاناتتى شارا وتكەندىگى تۋرالى بۇعان دەيىن حابارلاعان بولاتىنبىز.