بەيجىڭدە قىتاي مەن قازاقستان راديوستانتسيالارىنىڭ ىنتىماقتاستىعى ءسوز بولدى

 بەيجىڭ. قازاقپارات - ق ر ەلشىسى شاحرات نۇرىشيەۆ «قىتايدىڭ ۇلتتىق راديوسى» مەملەكەتتىك راديوكومپانياسىندا بولدى.

وندا ەلشى راديوكومپانيا باسشىسىنىڭ ورىنباسارى چجاو چجۋنينمەن جانە قازاق تىلىندە حابار تاراتاتىن ۇجىم وكىلدەرىمەن جۇزدەسىپ، قازاقستان مەن قىتاي قارىم- قاتىناستارىنىڭ بۇگىنى مەن بولاشاعى تۋرالى سۇحبات بەردى، دەپ حابارلايدى «قازاقپارات» ح اءا- ءنىڭ قىتايداعى مەنشىكتى ءتىلشىسى.

ديپلومات قىتاي اۋديتورياسىنىڭ قازاقستاندا بولىپ جاتقان وقيعالارعا دەگەن قىزىعۋشىلىعىنىڭ ارتا تۇسكەنىن باياندادى. سونىمەن قاتار ول قازاق تىلىندە تاراتىلاتىن حابارلاردىڭ سانىنىڭ ارتقانىنا نازار اۋداردى (بۇگىنگى تاڭدا ول تاۋلىگىنە 18 ساعاتتى قۇراپ وتىر) . سونداي- اق باعدارلاما الماسۋ مەن ولاردى قازاقستاندىق تاراپپەن بىرلەسىپ دايىنداۋدىڭ ارقاسىندا ەفير قۇرامى بۇرىنعىدان دا تولىقتىرىلا تۇسكەندىگىن جەتكىزدى. گۋمانيتارلىق باعىتتاعى بىرلەسكەن قيمىلداردىڭ جارقىن دالەلى رەتىندە ديپلومات «كومپوزيتور» اتتى قازاق- قىتاي بىرلەسكەن جوباسىن اتادى. اتالعان تۋىندى ەكى بەلگىلى كومپوزيتورلار سيان سينحاي مەن باقىتجان بايقاداموۆتىڭ ەكىنشى دۇنيەجۇزىلىك سوعىس كەزىندەگى دوستىعىن بەينەلەيدى. فيلمنىڭ كورسەتىلىمى 2018 -جىلدىڭ مامىر- ماۋسىم ارالىعىنا جوسپارلانعان.

تاراپتار جۇزدەسۋدە «قىتايدىڭ ۇلتتىق راديوسى» مەن قازاقستان راديوستانتسيالارىنىڭ «جىبەك جولى» ەكونوميكالىق بەلدەۋىنىڭ قۇرىلىسى مەن اتالمىش جوبانىڭ «نۇرلى جول» جاڭا ەكونوميكالىق ساياساتىمەن بايلانىسىن اقپاراتتىق قامتاماسىز ەتۋ جۇمىستارى اياسىندا ىنتىماقتاستىعىن تالقىلادى.

راديوستانتسيانىڭ قازاق تىلىندە حابار تاراتاتىن ۇجىمىنىڭ وكىلدەرىمەن جۇزدەسۋ بارىسىندا ەلشى جينالعانداردى ق ر پرەزيدەنتى نۇرسۇلتان نازاربايەۆتىڭ «ءتورتىنشى ونەركاسىپتىك ريەۆوليۋتسيا جاعدايىنداعى دامۋدىڭ جاڭا مۇمكىندىكتەرى» جولداۋىنىڭ نەگىزگى باعىتتارىمەن تانىستىردى.

اتاپ ايتقاندا، قۇجاتتا ۇكىمەت جۇمىسىنىڭ قازىرگى تاڭداعى باسىم باعىتى ەكونوميكانىڭ ءتۇرلى سالالارىن تسيفرلاندىرۋ بولىپ تابىلاتىندىعى ايتىلدى.

راديوستانتسيا قىزمەتكەرلەرى قازاقستاندا جۇزەگە اسىرىلىپ جاتقان «بولاشاققا باعدار: رۋحاني جاڭعىرۋ» باعدارلاماسىنا، لاتىن الىپبيىنە كوشۋ پروتسەسىنە ەرەكشە قىزىعۋشىلىق تانىتتى.

ايتا كەتەيىك، قىتايدىڭ ۇلتتىق راديوسى 1949 -جىلى قۇرىلعان. ول قازاق، ۇيعىر، تيبەت، كورەي، كانتون سياقتى تىلدەر مەن ديالەكتىلەردە 17 جيىلىكتە حابار تاراتادى.

قازاق راديوسىنىڭ نەگىزى 1971 -جىلى قالانعان، ونىڭ ءار كۇنگى ەفيرى 18 ساعاتتى قۇرايدى.