نۇرسۇلتان نازاربايەۆ ا ق ش- قا ساپارىن قورىتىندىلادى

نيۋ-يورك. قازاقپارات - بۇگىن نيۋ-يوركتە قازاقستان پرەزيدەنتى نۇرسۇلتان نازاربايەۆ امەريكا قۇراما شتاتتارىنا رەسمي ساپارىن قورىتىندىلاپ، قازاقستاندىق جانە شەتەلدىك ب ا ق وكىلدەرىنە سۇحبات بەردى، دەپ حابارلايدى قازاقپارات.

«مەن بۇل ەلگە رەسمي ساپارمەن كەلدىم. ءبىزدىڭ وڭىردەن كەلگەن ءبىرىنشى پرەزيدەنت بولدىم. مەنىڭشە، كەلىسسوزدەرىمىز وتە جاقسى، جوعارى دەڭگەيدە ءوتتى. كوپ ماسەلە جونىندە اڭگىمەلەسىپ، ورتاق ءتىل تابىستىق. بىزگە قولداۋ كورسەتەتىن بولدى، ول اسا قاجەت. ارينە، امەريكا قۇراما شتاتتارى دۇنيەدەگى ەكونوميكاسى، اسكەري قۋاتى جاعىنان ەڭ الىپ مەملەكەتتەردىڭ ءبىرى»، - دەدى ەلباسى.

مەملەكەت باسشىسى ا ق ش- تىڭ قازاقستاندى تاۋەلسىزدىك العان كۇننەن باستاپ قولداپ كەلە جاتقانىن باسا ايتتى. سونىمەن قاتار ەكى ەلدىڭ اراسىنداعى ەكونوميكالىق بايلانىستارعا دا توقتالدى.

«بىزگە امەريكالىق كومپانيالار 50 ميلليارد دوللاردان استام ينۆەستيتسيا قۇيدى. ارى دا جۇزەگە اسىرار جوبالارى بارشىلىق. 550 بىرلەسكەن ءوندىرىس جۇمىس ىستەيدى. امەريكالىق ىسكەر توپ وكىلدەرى ءبىزدىڭ ىسكەر ادامدارىمىزبەن دوڭگەلەك ۇستەل باسىندا كەزدەسكەندە 20 دان استام كەلىسىمشارتتارعا قول قويدى. 7,5 ميلليارد دوللاردىڭ جوباسىن بىرلەسىپ جۇزەگە اسىراتىن بولدى»، - دەدى قازاقستان پرەزيدەنتى.

نۇرسۇلتان نازاربايەۆ ترامپپەن ەكەۋارا كەزدەسۋى بارىسىندا وڭىرلىك جانە حالىقارالىق ساياسات ماسەلەلەرى دە قوزعالعانىن ايتتى. ونىڭ ىشىندە ورتالىق ازياداعى 5 مەملەكەتتىڭ امەريكامەن ىنتىماقتاستىعىنىڭ س5+1 جوباسى جايى، اۋعانستان ماسەلەسى، امەريكا مەن رەسەي اراسىنداعى جاعداي، ۋكراينا. سولتۇستىك كورەيا، سيريا. يران ماسەلەلەرى قوزعالعانىن اتاپ ءوتتى.

اۆتور: مارلان جيەمباي