نيۋ-يورك تۇرعىندارى «استانا بالەتتىڭ» ونەرىن تاماشالاۋ ءۇشىن ۇزىن-سونار كەزەككە تۇردى – فوتو، كەسكىن

نيۋ-يورك. قازاقپارات - «استانا بالەت» تەاترى ترۋپپاسىنىڭ ا ق ش- تىڭ نيۋ-يورك قالاسىندا ونەر كورسەتۋى جەرگىلىكتى تۇرعىندار اراسىندا اجيوتاج تۋدىردى، دەپ حابارلايدى «قازاقپارات» ح ا ا ءتىلشىسى.

لينكولن- ورتالىقتا ورنالاسقان Alice Tully Hall عيماراتىنىڭ كونسەرتتىك زالى الدىندا كەشتىڭ باستالۋىنا بىرنەشە ساعات قالعان كەزدە ۇزىن-سونار كەزەك قالىپتاستى. الايدا، زالدىڭ سىيىمدىلىعىنا بايلانىستى ونەر سۇيەر قاۋىمنىڭ بارلىعى كونسەرتكە كىرە المادى.

«مەن بالەتتى جاقسى كورەمىن جانە قازاقستاندىق بالەت مەكتەبىنىڭ حورەوگرافياسىن تاماشالاپ، ۇلتتىق ناقىشتىڭ ەرەكشەلىكتەرىن سەزىنگىم كەلەدى. سوندىقتان بۇگىن وسىندا كەلدىم، كىرۋ بيلەتىنە قولجەتكىزگەنىم ءۇشىن قۋانىپ وتىرمىن»، - دەدى قازاقپارات تىلشىسىنە كريس دجونسون.

كونسەرت باستالماس بۇرىن كورەرمەندەر فويەدە «قازاقستان الەم سۋرەتشىلەرىنىڭ كوزىمەن» اتتى فوتوكورمەسىن تاماشالادى.

«ءبىز استانا، ەكسپو-2017، قازاقستاننىڭ تابيعاتى، سونداي-اق قازاقستاندىقتاردىڭ ءداستۇرى مەن مادەنيەتى بەينەلەنگەن 50 سۋرەتتى كورمەگە قويدىق. كونسەرت زالىندا بوس ورىن بولمادى. بۇل كەش ەشكىمدى بەي-جاي قالدىرماعانى ءسوزسىز - كورەرمەندەر ءار ءنومىردى ءسۇيسىنىپ وتىرىپ تاماشالادى»، - دەدى فوتوكورمەنىڭ ۇيىمداستىرۋشىسى، عابيت مۇسىرەپوۆ اتىنداعى بالالار مەن جاس وسپىرىمدەرگە ارنالعان قازاق مەملەكەتتىك اكادەميالىق تەاترىنىڭ ديرەكتورى ءسابيت ءابدىقالىقوۆ.

ەسكە سالايىق، اتالمىش كونسەرتتى قازاقستان پرەزيدەنتى نۇرسۇلتان نازاربايەۆ تاماشالادى.

«استانا بالەت» تەاترى «جاھانداعى زاماناۋي قازاقستاندىق مادەنيەت» جوباسى اياسىنداعى «قازاقستان استانا بالەت گالا» باعدارلاماسىن ۇسىندى. باعدارلاماعا «ارۋلار»، «اق قىز»، «اسەمقوڭىر» حورەوگرافيالىق مينياتيۋرالارى، «شەلكۋنچيك» بالەتىندەگى اداجيونىڭ كلاسسيكالىق رەداكسياسى جانە باسقا دا قويىلىمدار ەنگەن.