نازاربايەۆتىڭ ا ق ش- قا ساپارى ۇزاق مەرزىمدى قارىم-قاتىناستىڭ العاشقى قادامى - امەريكالىق ساراپشى
مۇنداي پىكىردى «مۇرا» قورى سىرتقى ساياسات ورتالىعىنىڭ ديرەكتورى ليۋك كوففي ءبىلدىردى، دەپ حابارلايدى قازاقپارات ءتىلشىسى.
«پرەزيدەنت نۇرسۇلتان نازاربايەۆتىڭ اق ۇيدە دونالد ترامپپەن وتكىزگەن كەزدەسۋىنە كوڭىلىم تولدى. ترامپتىڭ ەل باسقارعانىنا ءبىر جىل ۋاقىت تولماستان وسىنداي كەزدەسۋ وتكىزۋى قازاقستان مەن ا ق ش اراسىنداعى بايلانىستىڭ جاڭا دەڭگەيگە كوتەرىلگەنىن كورسەتەدى. قازاقستان - ا ق ش- تىڭ ورتالىق ازياداعى ماڭىزدى سەرىكتەسى. بىزگە ورتاق سىن-قاتەرلەر وتە مول، سونىمەن قاتار ورتاق مۇمكىندىكتەرىمىز دە جەتەرلىك. بۇل ساپار قازاقستان مەن ا ق ش اراسىنداعى ۇزاققا سوزىلاتىن قارىم-قاتىناستىڭ العاشقى قادامى بولادى دەپ ۇمىتتەنەمىن»، - دەدى ول.
ونىڭ ايتۋىنشا، ەكى ەل اراسىنداعى بايلانىستاردىڭ مۇمكىنشىلىكتەرى كوپ. ماسەلەن، قازاقستان پرەزيدەنتىنىڭ ساپارى اياسىندا ەكى ەلدىڭ اراسىندا جالپى سوماسى 7 ميلليارد دوللاردى قۇرايتىن 20 دان استام كەلىسىمگە قول قويىلدى.
«بۇل - وتە جاقسى جاڭالىق. اسىرەسە، ەنەرگەتيكا سالاسىنا قازاقستان مەن ا ق ش تاراپىنىڭ قىزىعۋشىلىعى ەرەكشە. سونداي-اق، بۇل كەلىسىمشارتتار قازاقستاننىڭ مۇنايى مەن گازىن جاڭا نارىققا شىعارىپ، ەكونوميكاسىن ءارتاراپتاندىرۋعا مۇمكىندىك بەرەدى. بۇدان بولەك، ا ق ش- تىڭ ەۋروپاداعى وداقتاستارىنا ەنەرگەتيكانىڭ جاڭا كوزدەرىن اشۋىنا جاعداي جاساپ، ەكى ەل اراسىندا قاۋىپسىزدىك ماسەلەسىندەگى سەرىكتەستىكتى نىعايتا تۇسەدى»، - دەدى ورتالىق باسشىسى.
ليۋك كوففيدىڭ پايىمىنشا، ەكى ەلدىڭ اۋعانستان پروبلەماسىن شەشۋگە دە كۇش بىرىكتىرۋگە مۇمكىنشىلىكتەرى بار. قازاقستان وڭىردەگى كوشباسشى مەملەكەت رەتىندە اۋعانستانداعى ەكونوميكالىق جانە قاۋىپسىزدىك ماسەلەلەرىندە تۇراقتىلىق قالىپتاستىرۋعا كومەك بەرە الادى.
«جالپى، قازاقستان كەيىنگى كەزدەرى كوپتەگەن ديپلوماتيالىق باستامالار كوتەرىپ جۇرگەنى ءمالىم. جانە دە بۇل ‒ وتە دۇرىس. مىسال رەتىندە سيريا جانجالىن رەتتەۋ جونىندەگى استانا پروتسەسىن ايتۋعا بولادى. ول ءبىز كۇتكەنىمىزدەن دە جوعارى تابىستى بولدى»، - دەدى ليۋك كوففي.
سونىمەن قاتار ول ترامپتىڭ ورتالىق ازياعا قاتىستى ساياساتىنىڭ الداعى ۋاقىتتا قالاي ءوربۋى مۇمكىندىگىنە بايلانىستى ويىمەن دە ءبولىستى.
«باراك وباما اۋعانستاندا تەرروريستەرمەن سوعىستىڭ اياقتالعانى جونىندە شەشىم قابىلداعان سوڭ، ورتالىق ازيامەن بايلانىسىمىز ازايا باستادى. وباما اكىمشىلىگى «س5+1» باستاماسىنان باسقا ايتارلىقتاي ەشتەڭە جاساعان جوق. مەنىڭشە، پرەزيدەنت ترامپ مۇلدە باسقا ساياسات ۇستانادى. بىزگە ەكى ەل اراسىنداعى ۇزاق مەرزىمگە سوزىلاتىن ارىپتەستىك كەرەك. ازىرگە ترامپ اكىمشىلىگى مۇنداي قادامعا بەلسەنە قويماسا دا، الداعى ۋاقىتتا وسى ماسەلەدەگى بايلانىستىڭ نىعاياتىنىنا سەنىمدىمىن»، - دەدى امەريكالىق ساراپشى.
اۆتور: مارلان جيەمباي