ەرلان قارين اق ۇيدەگى كەزدەسۋ تۋرالى: امەريكالىق جۋرناليستەردىڭ تاڭدانىسىن تۋدىردى
قازاقستان پرەزيدەنتىنىڭ ۆاشينگتونعا ساپارىنا وراي قازاقپاراتتىڭ ارناۋلى تىلشىسىنە سۇحبات بەرگەن قازاقستاننىڭ حالىقارالىق قاتىناستار كەڭەسىنىڭ ءتوراعاسى ەرلان قارين وسىلاي دەدى.
«مەنىڭشە، بۇگىن اق ۇيدەگى قازاقستان مەن ا ق ش پرەزيدەنتتەرىنىڭ كەزدەسۋى وتە جوعارى دەڭگەيدە ءوتتى دەۋگە تولىق نەگىز بار. سەبەبى، ءوز كوزىڭمەن كورىپ، جەكە باقىلاعاننان كەيىن كوپتەگەن جايتتارعا نازار اۋدارۋعا مۇمكىندىك بولدى. سوندىقتان بولار ا ق ش پرەزيدەنتى دونالد ترامپتىڭ نۇرسۇلتان نازاربايەۆتى ايرىقشا ىقىلاسپەن دايىندالىپ، كۇتكەنى بىردەن كوزگە ءتۇستى. اق ءۇيدىڭ الدىنان ءوزى قارسى الىپ، ۇزاق امانداسىپ، اق ءۇيدىڭ نەگىزگى بولمەسىنە الىپ بارۋى، سول جەردە بۇكىل تىلشىلەردىڭ الدىندا ەلباسىمىزعا بىرنەشە مارتە «اسا قادىرلى پرەزيدەنت» دەپ ءسوز ارناۋىنىڭ ءوزى قاسىمىزدا بولعان امەريكالىق جۋرناليستەردىڭ تاڭدانىسىن تۋدىردى. ولار «ترامپ سىزدەردىڭ باسشىلارىڭىزعا ايرىقشا ءىلتيپات بىلدىرگىسى كەلىپ تۇر» دەپ پىكىرلەرىمەن ءبولىستى. شىندىعىندا بۇل جايت انىق بايقالدى»، - دەدى ەرلان قارين.
ونىڭ ايتۋىنشا، ادەتتە امەريكالىق پرەزيدەنتتەر باسقا ەلدىڭ باسشىلارىمەن كەزدەسكەندە وزدەرىن جوعارى ۇستاۋعا ۇمتىلادى. مۇنداي وكتەمدىك ترامپتان دا، ونىڭ الدىنداعى پرەزيدەنتتەردەن دە بايقالاتىن. كەزدەسۋ بارىسىندا ارىپتەستەرىنە ءتىپتى، اقىل ايتىپ، ولاردىڭ جۇرگىزىپ وتىرعان ساياساتتارىنداعى كەمشىلىكتەردى كورسەتىپ، ەسكەرتۋ جاساۋعا ۇمتىلىسى كوزگە كورىنىپ تۇراتىن.
«امەريكالىق ساياساتتىڭ مۇنداي ارەكەتىنە كوپشىلىك ۇيرەنىپ تە كەتكەندەي. جايباراقات قارايدى. دەگەنمەن نازاردان تىس قالمايتىن. بۇل جولى اق ءۇي باسشىسى نۇرسۇلتان نازاربايەۆپەن كەزدەسۋى بارىسىندا قانداي دا ءبىر توسىن ماسەلە كوتەرىپ، ايتقان ەمەس. كەرىسىنشە، كەزدەسۋ بارىسىندا نۇرسۇلتان نازاربايەۆقا قايتا-قايتا قۇرمەت كورسەتىپ، قازاقستاننىڭ ءوز دامۋىندا وراسان زور جەتىستىكتەرگە قول جەتكىزگەندىگىن مويىنداپ، ونى جوعارى باعالايتىندىعىن ايتىپ وتىردى. وسى جايت امەريكالىق تاراپتىڭ قازاقستان پرەزيدەنتى ساپارىنا جوعارى دايىندىق جۇرگىزگەنىن، بۇل ساپار تەك بىزدەر ءۇشىن عانا ەمەس سونىمەن قاتار ولار ءۇشىن دە وتە جوعارى ماڭىزعا يە بولعانىن اڭعارۋعا بولادى»، - دەدى ساياساتتانۋشى.
وسى رەتتە قازاقستاننىڭ حالىقارالىق قاتىناستار كەڭەسىنىڭ ءتوراعاسى بۇل ساپاردىڭ ماڭىزدىلىعى نەلىكتەن دەگەن ساۋالعا دا جاۋاپ بەردى.
«سەبەبى نۇرسۇلتان نازاربايەۆ قازاقستان رەسپۋبليكاسىنىڭ باسشىسى بولۋمەن قاتار بىرنەشە مارتەبەگە يە بولىپ كەلگەن سياقتى. ياعني، ورتالىق ازيا ايماعىنىڭ، پوستكەڭەستىك مەملەكەتتەردىڭ، مۇسىلمان ەلدەرىنىڭ وكىلى، الەمدەگى ىقپالدى مەملەكەتتىڭ باسشىسى رەتىندە كەزدەسۋگە كەلگەنى جانە ا ق ش- تىڭ قازاقستاننىڭ ايماقتىق جانە جالپى حالىقارالىق پروتسەستەردەگى اتقارىپ وتىرعان رولىمەن ساناساتىندىعى بايقالدى»، - دەدى ەرلان قارين.
ونىڭ پايىمىنشا، كەزدەسۋدىڭ قورىتىندىسى ەكى ەل باسشىلارىنىڭ مەملەكەتارالىق قارىم-قاتىناستى جاڭا ستراتەگيالىق دەڭگەيگە كوتەرۋ جونىندەگى مالىمدەمە جاساۋى بولدى.
«بۇل شىنىمەن دە ۇلكەن ماڭىزدى ناتيجە. ول ا ق ش- تىڭ قازاقستاننىڭ ەرەكشە ءرولىن مويىنداعانىنىڭ كورىنىسى، قازاقستاننىڭ ايماقتىق، حالىقارالىق پروتسەستەردەگى ىقپالىنىڭ ارتقانىنىڭ دالەلى. سونىمەن قاتار ەلىمىزدىڭ سىرتقى ساياسي، گەوساياسي سالماعىن دا ارتتىرادى. قانشا دەگەنمەن ا ق ش الەمدەگى سۋپەردەرجاۆا، الەمدەگى 1№ ەكونوميكا. دەمەك وسىنداي كەزدەسۋلەر ەلىمىزدىڭ باسقا مەملەكەتتەر الدىنداعى بەدەلىن، مارتەبەسىن جوعارىلاتاتىندىعى ءسوزسىز. بۇل كەزدەسۋ ەكى ەل اراسىنداعى ساياسي، ەكونوميكالىق بايلانىستاردىڭ ودان ارى دامۋىنا سەرپىن بەرەرى انىق. سول سەبەپتى بۇگىنگى كەزدەسۋ ەرەكشە، تاريحي ماڭىزى بار كەزدەسۋ بولدى. ەلباسىنىڭ ساپارى ءالى اياقتالماسا دا، العاشقى كۇننىڭ ءوزى وراسان زور ناتيجەلى بولعاندىعىن، ساپاردىڭ نەگىزگى ماقساتتارىنىڭ جۇزەگە اسقاندىعىن، ءتىپتى ءبىز كۇتكەن، بولجاعان ماقساتتاردان اسىپ تۇسكەنىن كورىپ وتىرمىز»، - دەدى قازاقستاننىڭ حالىقارالىق قاتىناستار كەڭەسىنىڭ ءتوراعاسى.
اۆتور: مارلان جيەمباي