قازاقستان كورەي تۇبەگىندەگى يادرولىق قارۋعا قاتىستى ماسەلەدە سەنىمدى ارىپتەسىمىزگە اينالدى - دونالد ترامپ

ۆاشينگتون. قازاقپارات - قازاقستان كورەي تۇبەگىندەگى يادرولىق قارۋعا قاتىستى ماسەلەدە ا ق ش- تىڭ سەنىمدى ارىپتەسىنە اينالدى.

بۇل تۋرالى بۇگىن اق ۇيدە قازاقستان پرەزيدەنتى نۇرسۇلتان نازاربايەۆپەن ەكەۋارا كەزدەسۋدەن كەيىن بىرلەسكەن مالىمدەمە جاساۋ بارىسىندا امەريكا قۇراما شتاتتارىنىڭ پرەزيدەنتى دونالد ترامپ ايتتى، دەپ حابارلايدى قازاقپارات.

«قازاقستان كورەي تۇبەگىندەگى يادرولىق قارۋعا قاتىستى ماسەلەدە سەنىمدى ارىپتەسىمىزگە اينالىپ وتىر. ءبىز بىرلەسىپ سولتۇستىك كورەيا رەجىمىنىڭ الەمگە يادرولىق قارۋ قاۋپىن توندىرۋىنەن قورعاي الامىز. پرەزيدەنت نازاربايەۆقا اۋعانستانداعى ارەكەتىمىزگە قولداۋ كورسەتكەنى ءۇشىن العىس ايتامىن. قازاقستاننىڭ دايش جانە تاليبان سودىرلارىمەن كۇرەستە ماڭىزدى لوگيستيكالىق قولداۋ كورسەتۋىن جوعارى باعالايمىن»، - دەدى ول.

سونىمەن قاتار ترامپ قازاقستاننىڭ اۋعان جاستارىنىڭ ءبىلىم الۋىنا جاعداي جاساۋىن، ەلدەگى قاۋىپسىزدىكتى نىعايتۋعا بەلسەنە كومەك كورسەتكەنىن جوعارى باعالايتىندىعىن باسا ايتتى.

«ءبىز قازاقستاندى كورشىلەرىنە قۇرمەتپەن قارايتىن، ءوز تاعدىرىنا، وزىنە جاۋاپتى ەگەمەن ەل رەتىندە ەسەپتەيمىز. پرەزيدەنت نازاربايەۆ 2050-جىلى قازاقستاندى الەمنىڭ دامىعان 30 ەلىنىڭ قاتارىنا قوسۋ جوسپارىمەن ءبولىستى. سونىمەن قاتار ەلدەگى بيزنەس وكىلدەرىنە قولايلى جاعداي جاسالعانىن مالىمدەدى. بۇل ءوز كەزەگىندە امەريكالىق كومپانيالاردىڭ قازاقستاندى ءتيىمدى جۇمىس ىستەۋىنە مۇمكىندىك جاسايدى. امەريكالىق كاسىپكەرلەر قازاقستان ەكونوميكاسىنا ينۆەستيتسيا سالۋ بويىنشا الدىڭعى قاتاردا. ەكى اراداعى ساۋدا جانە ەكونوميكالىق بايلانىستى نىعايتۋ ماقساتىندا ن. نازاربايەۆ ا ق ش- تىڭ ىسكەرلىك توپتارىنىڭ وكىلدەرىمەن كەزدەسەدى. ءبىز ساۋدانىڭ ەكىجاقتى جانە ءادىل بولۋى كەرەك ەكەنىنە كەلىسەمىز»، - دەدى ا ق ش پرەزيدەنتى.

اۆتور: مارلان جيەمباي