ب ۇ ۇ قاۋىپسىزدىك كەڭەسىنىڭ مۇشەلەرى اۋعانستانعا باردى
بۇل ساپاردا قاۋىپسىزدىك كەڭەسىنىڭ مۇشەلەرى بەيبىتشىلىكتى نىعايتۋ مەن دامۋدىڭ العا باسۋىنا باعىتتالعان اۋعاندىقتارعا قولداۋ كورسەتتى. كابۋلداعى كەزدەسۋ بارىسىندا قاۋىپسىزدىك كەڭەسىنىڭ وكىلدەرى اۋعاندىقتاردى وڭىرلىك ىنتىماقتاستىقتى نىعايتۋعا جانە جوسپارلى تۇردە پارلامەنتتىك جانە پرەزيدەنتتىك سايلاۋدى ءادىل وتكىزۋگە شاقىردى.
ساپاردى بيىل قاڭتاردا ب ۇ ۇ قاۋىپسىزدىك كەڭەسىنىڭ ءتوراعاسى بولىپ تابىلاتىن قازاقستان ۇيىمداستىردى. دەلەگاتسياعا ب ۇ ۇ جانىنداعى قازاقستاننىڭ تۇراقتى وكىلى قايرات وماروۆ باسشىلىق ەتتى. ونىڭ قۇرامىنا بوليۆيا، ۇلى بريتانيا، ەكۆاتوريالىق گۆينەيا، ەفيوپيا، نيدەرلاندى، قىتاي، كوت-د'يۆۋار، كۋۆەيت، پەرۋ، پولشا، رەسەي، فرانسيا، ا ق ش پەن شۆەتسيا ەلشىلەرى كىردى.
كابۋلدا قاۋىپسىزدىك كەڭەسىنىڭ مۇشەلەرى اۋعانستان پرەزيدەنتى موحامماد اشراف گانيمەن جانە ەلدىڭ باسقا دا كوشباسشىلارىمەن، سونىڭ ىشىندە سىرتقى ىستەر، ىشكى ىستەر، قارجى، ساۋدا جانە اۋىل شارۋاشىلىعى مينيسترلەرىمەن كەزدەستى. قاۋىپسىزدىك كەڭەسىنىڭ دەلەگاتسياسى پارلامەنت مۇشەلەرىمەن، ۇكىمەتتىك ەمەس ۇيىمداردىڭ وكىلدەرىمەن جانە ساياسي پارتيا باسشىلارىمەن، سونداي-اق ب ۇ ۇ ميسسياسى جانە ناتو وپەراتسياسىنىڭ باسشىلارىمەن كەزدەسۋ وتكىزدى.
«كەزدەسۋ بارىسىندا نەگىزگى ساياسي احۋال تالقىلانىپ، قاۋىپسىزدىك، الەۋمەتتىك-ەكونوميكالىق جاعداي مەن ەلدەگى ادام قۇقىعى ماسەلەلەرى قارالدى»، - دەلىنگەن حابارلامادا.
قاۋىپسىزدىك كەڭەسىنىڭ مۇشەلەرى اۋعانستان ۇكىمەتىنىڭ رەفورمالار سالاسىنداعى، سونىڭ ىشىندە جەمقورلىققا قارسى ءىس-قيمىل سالاسىنداعى باستامالارىنا قولداۋ كورسەتتى.