قاسىم-جومارت توقايەۆ فين پارلامەنتشىلەرىمەن كەزدەستى
كەزدەسۋ بارىسىندا ەكىجاقتى قاتىناستار جانە پارلامەنتارالىق ىنتىماقتاستىق ماسەلەلەرى تالقىلاندى. سەنات ءتوراعاسى 1917-جىلى تاۋەلسىزدىك العاننان بەرى فينليانديا جوعارى دەڭگەيدەگى ەكونوميكالىق جانە تەحنولوگيالىق دامۋ ناتيجەسىن كورسەتىپ كەلە جاتقانىن اتاپ ءوتتى. ق. توقايەۆتىڭ ايتۋىنشا، فينليانديامەن قارىم-قاتىناس، اسىرەسە «جاسىل» تەحنولوگيالار مەن جاڭارتىلاتىن ەنەرگيا كوزدەرىن پايدالانۋ ترانسفەرتى ماسەلەلەرى بويىنشا تاجىريبەسى مول سۋوميمەن ىنتىماقتاستىق قازاقستانعا زور ىقىلاس تۋعىزىپ وتىر.
ق. توقايەۆ الەمدىك جانە ءداستۇرلى دىندەر ليدەرلەرىنىڭ 2015-جىلعى V سەزىنىڭ جۇمىسىنا قوسقان ۇلەسىنە وراي فينليانديا پرەزيدەنتى س. نيينيستەگە ريزاشىلىق ءبىلدىردى جانە حالىقارالىق مامانداندىرىلعان ەسكپو-2017 كورمەسىنە بەلسەندى قاتىسقانى ءۇشىن فين باسشىلارىنا العىس ايتتى. تاراپتار استاناداعى ەكسپو الاڭدارىندا كورسەتىلگەن جوبالار: ب ۇ ۇ «جاسىل» تەحنولوگيالار مەن ينۆەستيتسيالىق جوبالاردى دامىتۋ جونىندەگى حالىقارالىق حاب، «استانا» حالىقارالىق قارجى ورتالىعى، حالىقارالىق ІТ- ستارتاپ تەحنوپاركى اياسىندا بۇدان بىلايعى ىنتىماقتاستىقتىڭ كەلەشەگى تۋرالى تۋرالى پىكىر الماستى.
فين دەپۋتاتىنىڭ ايتۋىنشا، بۇل سالانىڭ ەكىجاقتى ىنتىماقتاستىق الەۋەتىن ىسكە اسىرۋدىڭ زور مۇمكىندىگى بار. سەنات ءتوراعاسى قازاقستان مەن فينليانديانىڭ كولىك-لوگيستيكا سالاسىنداعى، اسىرەسە، قىتايدىڭ «ءبىر بەلدەۋ، ءبىر جول» جانە قازاقستاننىڭ «نۇرلى جول» باعدارلاماسىن ۇشتاستىرۋ تۇرعىسىندا ارىپتەستىك قاتىناستارىنىڭ كەلەشەگى زور ەكەنىن اتاپ ءوتتى.
«ءبىز فينليانديانى بالتىق جاعالاۋى جانە سولتۇستىك ەۋروپا ايماعىنداعى جەتەكشى كولىك حابى رەتىندە قاراستىرامىز»، - دەدى ق. توقايەۆ.
سەنات ءتوراعاسى ءبىلىم بەرۋ سالاسىنداعى ىنتىماقتاستىققا باسا نازار اۋدارا وتىرىپ، كەڭىنەن تاجىريبە بولىسۋگە، سونداي-اق وقىتۋشىلار مەن ستۋدەنتتەردى الماستىرۋعا شاقىردى. پارلامەنت جوعارعى پالاتاسىنىڭ باسشىسى پرەزيدەنت ن. نازاربايەۆتىڭ جىل سايىنعى جولداۋى تۋرالى حاباردار ەتىپ، ءتورتىنشى ونەركاسىپتىك ريەۆوليۋتسيا جاعدايىنداعى ەلىمىزدى جاڭعىرتۋدىڭ 10 نەگىزگى مىندەت جايىندا ايتىپ بەردى.
ۆ. سكينناري جولداۋدى جوعارى باعالاي وتىرىپ، ەكى ەلدىڭ الدىندا تۇرعان: سيفرلاندىرۋ، ەكونوميكالىق رەفورمالار، «جاسىل» تەحنولوگيالاردى دامىتۋ قاجەتتىگى، سىبايلاس جەمقورلىقپەن كۇرەس جانە باسقا دا جاۋاپتى مىندەتتەردىڭ ورتاقتىعىن اتاپ ءوتتى. «بۇل قاتەرلەردى ويداعىداي ەڭسەرۋ ءۇشىن بىزگە بىرگە جۇمىس ىستەۋ كەرەك»، - دەدى فين پارلامەنتشىسى.
ول قازاقستان الدىندا اۋقىمدى مىندەتتەردى شەشۋدە فينليانديانىڭ جاردەمدەسۋگە ءازىر ەكەنىن ناقتىلادى. سەنات باسشىسى ەكىجاقتى پارلامەنتتىك ءوزارا ءىس-قيمىلدىڭ قارقىنىنا ريزاشىلىق ءبىلدىرىپ، فين تاراپىن پارلامەنتتىك دەلەگاتسيالار الماسۋعا شاقىردى.