ءتۇرلى جانرداعى حورەوگرافيالىق ونەردىڭ بۇل كورسەتىلىمى ق ر مادەنيەت جانە سپورت مينيسترلىگىنىڭ باستاماسىمەن وتكىزىلىپ وتىرعان «جاھانداعى زاماناۋي قازاقستان مادەنيەتى» جوباسىنىڭ اياسىندا ۇيىمداستىرىلماقشى. بۇل تۋرالى قازاقپارات «استانا بالەت» تەاترىنىڭ PR- قىزمەتىنە سىلتەمە جاساپ حابارلايدى.
«استانا بالەت» تەاترىنىڭ نيۋ- يوركتەگى بۇل باعدارلاماسى «ەل جۇرەگى - استانا» اتتى ەلورداسىنىڭ جيىرما جىلدىعىنا ارنالعان مەرەكەلىك مادەني ءىس- شارالاردىڭ باسى بولماق. وسى جىلداردىڭ ىشىندە ەل ورداسى قازاقستاننىڭ عانا ەمەس، جالپى ورتالىق ازيا ايماعىنىڭ قوعامدىق- ساياسي جانە مادەني ءومىرىنىڭ ءىرى ورتالىعىنا اينالىپ ۇلگەردى. استانا ەۋرازيا اۋماعىنداعى حالىقارالىق ورتالىق سانالادى.
لينكولن ورتالىعىندا «استانا بالەت» ترۋپپاسى وتاندىق حورەوگرافيا ونەرىن العاش تانىستىرىپ وتىرعان جوق. وسىدان ءۇش جىل بۇرىن، جەتەكشى حورەوگرافيالىق ۇجىمنىڭ امەريكالىق ساحناداعى دەبيۋتى ءوتىپ، سۇلۋلىق پەن اسەمدىك، سىمبات پەن نازىك بەينەلەر الەمى نيۋ- يورك كورەرمەنىنىڭ تاڭدانىسىن تۋدىرعان ەدى. بۇل جولى كورەرمەندەردىڭ ىقىلاسىنا بولەنگەن «استانا بالەت» اتتى ەڭ جاس قازاقستاندىق تەاتر كونتراستتى باعدارلاماسىن ۇسىنباقشى. ول پلاستيكا تىلىمەن جەتكىزىلگەن ۇلتتىق مادەنيەت ورنەكتەرى مەن جارقىن بالەت سپەكتاكلدەرىنىڭ ۇزىندىلەرى.
«تەاتردىڭ شىعارماشىلىق ۇجىمىن ۇلكەن جۇمىس كۇتىپ تۇر. مادەنيەتىمىزدى تانىستىرىپ، قازاقستاننىڭ ۇلتتىق جانە زاماناۋي بالەت ونەرىن الەمدىك قاۋىمداستىققا پاش ەتىپ، كورەرمەن پەيىلىن وزىمىزگە قاراتىپ الۋىمىز كەرەك»، - دەدى، تەاتر ديرەكتورى ۆالەري كۇزەمبايەۆ.
«استانا بالەت» كلاسسيكالىق مۇرا مەن زاماناۋي بالەت ونەرىنىڭ بار بايلىعىن بويىنا ءسىڭىرىپ، سونىڭ نەگىزىندە تىڭ حورەوگرافيالىق تۋىندىلار مەن ورىنداۋشىلىق ونەردىڭ جاڭا ۇلگىلەرىن جاساپ كەلەدى. «استانا بالەت» تەاترى زاماناۋي باعىتتاعى ۇلتتىق ءبيدى زەرتتەپ، دامىتۋعا دا باسا كوڭىل اۋدارىپ، قازاق ءبيىنىڭ سۇلۋلىعى مەن پلاستيكالىق ۇيلەسىمدىگىن اشاتىن جاڭا حورەوگرافيالىق مينياتيۋرالار شىعارىپ ءجۇر. مۇندا حالىق ءبيىنىڭ تامىرى تەرەڭ، ەرەكشە سيپاتىنا، ونىڭ بولمىسىنا بارىنشا ءمان بەرىلەدى. سەبەبى، ۇلتتىق بي ارقىلى كورەرمەن ءبىزدىڭ مادەنيەتىمىزبەن تانىسادى. سوندىقتان ۇلتتىق بي، تەاتردىڭ بارلىق گاسترولدىك ساپارلارىنداعى كونسەرتتىك باعدارلامالارعا قوسىلىپ، ءبىزدىڭ تەاتردى ايگىلەپ تۇرعان دۇنيەگە اينالدى.
«نيۋ- يورككە ساپارىمىزدان كەيىن، تەاتر جاڭا شىعارماشىلىق بەلەستەردى باعىندىرۋعا قاناتتانادى دەپ ويلايمىن. جاس ارتىستەر ءۇشىن گاسترول - شىعارماشىلىعىنا شابىت بىتىرەتىن دۇنيە، سونىمەن قاتار، جاڭا كورەرمەن، بوتەن اۋديتوريانىڭ الدىندا ءوز كۇش- قۋاتىڭ مەن مۇمكىندىگىڭدى سىناۋدىڭ جولى. نيۋ- يوركتەگى گاسترولگە رەپەرتۋارىمىزداعى ەڭ ۇزدىك قويىلىمداردى تاڭدادىق - «ۇلى دالا مۇراسى» اتتى حورەوگرافيالىق مينياتيۋرالار مەن بالەت ۇزىندىلەرىنەن قۇرالعان ۇلتتىق باعدارلاما؛ التىناي اسىلمۇراتوۆا قويعان «شەلكۋنچيك» بالەتىنەن پا- دە- دە؛ «Divercity» جانە «A fuego lento» اتتى نەوكلاسسيكالىق بالەتتەردىڭ ۇزىندىلەرى، بەلگيالىق حورەوگراف ر. امارانتەنىڭ «Love Fear Loss» اتتى ءبىر اكتىلى بالەتى قويىلادى»، - دەيدى تەاتردىڭ باس بالەتمەيستەرى مۋكارام اۆاحري.
«ۇلى دالا مۇراسى» باعدارلاماسىنا ۇلتتىق بوياۋى قانىق حورەوگرافيالىق مينياتيۋرالار مەن بالەت ۇزىندىلەرى ەنىپ وتىر. بارلىق كومپوزيتسيالاردان حالىق ءداستۇرىنىڭ بايلىعىن تانىپ، سان- قىرلى ەموتسيالىق كۇيگە بولەنەسىز. كوركەم مۋزىكا، قايتالانباس كوركەم بەينەلەر ارقىلى بۇل قويىلىمدار جۇرەگىڭىزدىڭ تۇبىنە بويلاپ، جادىڭىزدا حاتتالىپ قالادى. «ۇلى دالا مۇراسى» باعدارلاماسىنا قاراپ، جارقىن، ەكپىندى دامىپ كەلە جاتقان ءارى بىرەگەي زاماناۋي ۇلتتىق بالەت جايلى باعامداۋعا بولادى.
«Love Fear Loss» (مۋزىكا - ەديت پياف رەپەرتۋارىنداعى اندەردىڭ تاقىرىبى، حورەوگراف - ريكاردو امارانتە) - ەديت پيافتىڭ عاجايىپ ومىرىنەن ءنار الىپ، ونىڭ اندەرىنىڭ اۋەنىنەن سۋسىنداعان تۋىندى. مۇندا ايگىلى ءانشىنىڭ ءتۇرلى ەرلەرمەن قارىم- قاتىناسى كورىنىس تاپقان. ءبىر ارناعا توعىسقان پياف اندەرى ماحاببات ۇرانىنا اينالىپ، الەمدى تامساندىردى. بالەتتىڭ ءار دۋەتى قۇشتارلىق پەن ماحاببات، ايىرىلىپ قالۋ قاۋپى مەن ۇرەي سەزىمدەرىن ورنەكتەيدى.
«A fuego lento» اتتى كەلەسى ءبىر اكتىلى بالەت - ماحاببات سەزىمىنە العاش ەلىتكەن تۇستاعى بويىڭىزدى بيلەگەن ۇرەي مەن دۇلەي كۇشتى سيپاتتايدى. ءتانىڭىز ەرەكشە كۇيگە بولەنىپ، ال، قۇشتارلىق سەزىمى تۇلا- بويىڭىزدى ورتەيدى. عاشىق جاننىڭ ءارقايسىسى ءۇشىن كۇللى الەم سۇيىكتىسىنىڭ اينالاسىنا توعىسىپ، ءومىردىڭ ءمانى تەك ماحاببات بولماق. (مۋزىكا - لالو شيفرين، استور پياتستسوللا، كارلوس گاردەل، حورەوگراف - ريكاردو امارانتە).
رەپەرتۋاردىڭ سان- الۋاندىعى، ورىنداۋشىلىق شەبەرلىك پەن ساحنالىق بەزەندىرۋدىڭ جوعارى ساپاسىنىڭ ارقاسىندا «استانا بالەت» تەاترىنىڭ قويىلىمدارى ءوز ەلىمىزدە عانا ەمەس، شەتەلدەردە دە زور قوشەمەتپەن قابىلدانادى.
ەستەرىڭىزگە سالا كەتەيىك، «استانا بالەت» تەاترى ماسكەۋ مەن سانكت- پەتەربور (رەسەي)، بەيجىڭ (قىتاي)، پاريج (فرانسيا)، ۆەنا (اۆستريا)، سەۋل (كورەيا)، بۋداپەشت (ماجارستان)، باكۋ (ازەربايجان)، مينسك (بەلارۋس)، نيۋ- يورك (ا ق ش)، توكيو (جاپونيا)، ۆارشاۆا (پولشا)، بريۋسسەل (بەلگيا) قالالارىنىڭ ايگىلى ساحنالارىندا ونەر كورسەتكەن.