ب ۇ ۇ وكىلى قازاق ديپلوماتتارىنىڭ كاسىبيلىگىنە ءتانتى بولدى
«قازاقستاننىڭ ديپلوماتيالىق قىزمەتىنە باعا بەرە كەتسەم دەيمىن. قاۋىپسىزدىك كەڭەسىنە قاتىسقان تاجىريبەمە سۇيەنە وتىرىپ، قازاقستاندىق ديپلوماتيا ءوزىنىڭ كاسىبي دەڭگەيىنىڭ جوعارى ەكەندىگىن كورسەتتى جانە كورسەتىپ تە كەلە جاتقانىن باسا ايتقىم كەلەدى. وسى تۇرعىدا قاۋىپسىزدىك كەڭەسىنىڭ مۇشەلەرى مەن ب ۇ ۇ باس اسسامبلەياسى بۇل جۇمىستاردى جوعارى باعالايدى دەپ ويلايمىن. قازاقستانعا الداعى ۋاقىتتا دا ءوز جۇمىستارىن وسىنداي كونسترۋكتيۆتى، كاسىبي رۋحتا جالعاستىرا بەرۋىنە تىلەكتەسپىن»، - دەدى ميروسلاۆ ەنچا.
سونىمەن قاتار ب ۇ ۇ وكىلى قازاقستاننىڭ ب ۇ ۇ قاۋىپسىزدىك كەڭەسىنە ءتوراعالىعىنا قاتىستى پىكىرىن ءبىلدىردى.
«وسى ايدا قازاقستان ب ۇ ۇ قاۋىپسىزدىك كەڭەسىنە ءتوراعالىق ەتەدى. بۇل ايرىقشا ماڭىزدى ءرول. ويتكەنى قازاقستان قاۋىپسىزدىك كەڭەسىنىڭ ءتوراعاسى رەتىندە ونىڭ وتىرىسىن شاقىرىپ، كۇن ءتارتىبىن ۇيىمداستىرادى جانە قاۋىپسىزدىك كەڭەسى اتىنان ءسوز سويلەيدى. كەلەسى اپتادا قاۋىپسىزدىك كەڭەسىنىڭ بىرنەشە وتە ماڭىزدى وتىرىسى بولادى. ءبىرىنشىسى - پرەزيدەنت نۇرسۇلتان نازاربايەۆتىڭ قاتىسۋىمەن يادرولىق قارۋسىزدانۋ، سەنىم شارالارى ماسەلەلەرىنە ارنالعان وتىرىس. 19- قاڭتار، جۇما كۇنى ورتالىق ازيا مەن اۋعانستان ماسەلەلەرىنە ارنالعان وتىرىس وتەدى»، - دەدى ميروسلاۆ ەنچا.
ايتا كەتەيىك، 2018-جىلدىڭ 16-18- قاڭتارى ارالىعىندا نۇرسۇلتان نازاربايەۆ امەريكا قۇراما شتاتتارىنا رەسمي ساپارمەن بارادى. ساپار بارىسىندا ا ق ش پرەزيدەنتى دونالد ترامپپەن، سونداي-اق ا ق ش- تىڭ رەسمي جانە ىسكەر توپتار وكىلدەرىمەن كەزدەسۋلەر جوسپارلانىپ وتىر. پرەزيدەنت سونداي-اق ب ۇ ۇ قاۋىپسىزدىك كەڭەسىنىڭ وتىرىسىنا قاتىسادى.
اۆتور: مارلان جيەمباي