شىعىس قازاقستاندا وپەراتسيانى ەندى وزىق ۇلگىدەگى روبوت جاسايدى
اتالعان قۇرىلعى وسى ەمحانا بازاسىندا جۋىقتا اشىلاتىن روبوتتاندىرىلعان حيرۋرگيا جانە ترانسپلانتاتسيا ورتالىعىندا ورنالاستىرىلاتىن بولادى.
«روبوت حيرۋرگيالىق، ۋرولوگيالىق، گينەكولوگيالىق وتانىڭ بارلىعىن جاساي بەرەدى. وتا دەنەنى كەسكىلەمەي، بىرنەشە جەردەن تەسۋ ارقىلى جاسالادى. رەسەيدە دا ۆينچي ماركالى روبوتتار بار. ونىڭ قۇرالدارى ءبىر وتادان كەيىن جارامسىز بولىپ قالادى. جاڭالاپ وتىرۋ قاجەت. ال ءبىز العان روبوت ۇزاق مەرزىمگە ارنالعان. سوندىقتان باعاسى دا قىمبات»، - دەيدى اتالعان ەمحانانىڭ باس دارىگەرى يۋري ستاروكوجيەۆ.
ونىڭ ايتۋىنشا، روبوت الداعى ۋاقىتتا اۋرۋحانادا جاسالاتىن بارلىق وتانىڭ 30-40 پايىزىن ءوز موينىنا الماق. قازىرگى ۋاقىتتا روبوتتى تەحنيكاعا قاجەتتى قۇرال-جابدىقتاردىڭ بارلىعى جەتكىزىلىپتى، تەك بلوكتاعى جوندەۋ جۇمىستارىن اياقتاۋ قالىپتى.
«بۇل ورتالىقتىڭ اشىلۋى مەديتسينالىق ءتۋريزمدى دامىتۋعا سەرپىن بەرەدى دەپ ويلايمىز. ويتكەنى، مۇندا وبلىس پەن ەلىمىزدىڭ تۇرعىندارى عانا ەمەس، رەسەيلىكتەر دە ەمدەلەدى دەگەن جوسپارىمىز بار»، - دەيدى وبلىستىق دەنساۋلىق ساقتاۋ باسقارماسىنىڭ باسشىسى مارات شورانوۆ. وبلىس اكىمى دانيال احمەتوۆ جاڭا جىل قارساڭىندا وسى ورتالىق جۇمىسىمەن تانىسىپ، لوندوننىڭ ەڭ ۇزدىك اۋرۋحانالارىندا بىلىكتىلىكتەرىن شىڭداپ، ارنايى كۋرستاردان ءوتىپ كەلگەن ءوڭىردىڭ مەديتسينالىق قىزمەتكەرلەرىمەن كەزدەستى. بۇل ماماندار روبوتتاندىرىلعان حيرۋرگيا، انا جانە بالا ءومىرى، ونكولوگيا، جۇرەك- قانتامىرلارى اۋرۋلارى بويىنشا ءوز بىلىمدەرىن جەتىلدىرىپ ورالعان بولاتىن.
«ءبىزدىڭ وبلىستىق اۋرۋحانادان 13 ادام گەرمانيا مەن انگليادا بىلىمدەرىن جەتىلدىرىپ قايتتى. مەنەن باسقاسىنىڭ ءبارى 30-35 جاستاعى ماماندار. باتىستان ۇيرەنەتىن باستى دۇنيە - ۇزىن-سونار كەزەكتىڭ جوقتىعى. مۇنداي جۇيە ءبىزدىڭ دياگنوستيكالىق ورتالىقتا بار. سول ءتاسىلدى وبلىستىق اۋرۋحاناعا دا ەنگىزەمىز. ولاردا شۇعىل تۇسكەن ناۋقاستار بولەك قابىلدانادى. قالعان ناۋقاستار «جوسپارلى گوسپيتال» بولىمىندە قارالادى. ءبىز دە جاڭا مودۋل سالىپ، شۇعىل مەديتسينالىق كومەك بلوگىن اشپاقپىز»، - دەيدى وبلىستىق اۋرۋحانانىڭ مەڭگەرۋشىسى جايىق جۇماحانوۆ.
وبلىس اكىمى د. احمەتوۆ بۇل باعىتتاعى جۇمىس توقتامايتىنىن ايتىپ، سانيتارلىق قىزمەتكەردىڭ دە ەۋروپالىق مەديتسينا دەڭگەيىمەن تانىسۋى كەرەكتىگىن ايتتى. «مەديتسينانىڭ ساپاسىن كوتەرۋ ءۇشىن زاماناۋي قۇرالدار الۋ جەتكىلىكسىز. سوندىقتان بۇل جۇمىس جالعاسادى. ەندى وزدەرىڭىز وقىپ كەلگەن جەتەكشى كلينيكالارمەن ارىپتەستىك بايلانىس ورناتىڭىزدار. ولاردىڭ بىلىكتى ماماندارى وسىندا وتالارعا قاتىسىپ، پراكتيكالىق ساباق جۇرگىزسىن. بولاشاقتا زىريان، اياگوز قالالارىندا، ءۇرجار اۋدانىندا ينسۋلت ورتالىعىن اشۋىمىز مۇمكىن. وندا دا سوڭعى ۇلگىدەگى قۇرالدار مەن شەتەلدەن ءبىلىمىن جەتىلدىرگەن ماماندار جۇمىس ىستەيتىن بولادى. دارىگەرلەرگە ۇلكەن مۇمكىندىك ۇسىنىپ وتىرمىز. وعان ىلەسە الماعاندار كوشتەن قالا بەرەدى»، - دەيدى ايماق باسشىسى.