بەينەجازباسىندا قاريا جاڭا جىل قارساڭىندا قازاقستاندىقتاردى ءانشىنى كەشىرۋگە شاقىردى، دەپ حابارلايدى Baq.kz اقپارات اگەنتتىگى Pavlodarnews.kz سايتىنا سىلتەمە جاساپ.
اسەتوللا مەدەۋوۆتىڭ ايتۋىنشا، 21 - جەلتوقسان كۇنى جۇبايى ەكەۋىنىڭ وتاۋ قۇرعانىنا 49 جىل تولعان. وسىعان وراي، اقساقال كونسەرتكە بارعان.
«بالكوندا وتىرىپ داۋىس كوتەرگەن قىزىلوردالىق كورەرمەننىڭ قىلىعى دۇرىس بولمادى. ال جاس ءانشىنىڭ ساحنادا ايتقانى اشۋ ۇستىندە بولدى. ول البىرت جۇرەكتى جىگىت. ەندى قاناتتانىپ كەلە جاتقان تالانت. ەلىمدى كوركەيتەمىن دەپ جۇرگەن ازاماتتى باسىپ تاستاۋ قاتەلىك دەپ ەسەپتەيمىن. كەشىرىمدى بولۋ كەرەك. باس كەسپەك بولسا دا، ءتىل كەسپەك جوق. ۇلكەن قاريالار وعان وسى كۇنگە دەيىن تالاي باتاسىن بەردى. «وركەنىڭ ءوسسىن» دەپ تىلەگىن ايتتى» ، - دەيدى 70 جاستاعى قاريا.
سونداي- اق، اقساقال پاۆلودار وبلىسى بيلىگىنىڭ «تورەعالي تورەالى رەسمي ءىس- شارالارعا قاتىسپايدى» دەگەن شەشىمىن اسىعىس جاسالعانىن ايتادى.
«مەنىڭ انام جول اپاتىنا ۇشىراپ، 12 ادامنىڭ اراسىندا جالعىز كوز جۇمدى. جۇرگىزۋشى بولعان جيەن اعامدى سوتتاۋعا بولاتىن ەدى. ءبىراق قازاقتا «كەشىرىمدى بولۋ» ، «كۇنشىل بولما» دەگەن ءسوز بار. ونىڭ قاسىندا تورەعاليدى كەشىرۋگە بولادى عوي. اشۋمەن ايتىلعانى بەلگىلى. جاس بالانىڭ جاستىعى. سول كونسەرتتە مۇگەدەك بالا فوتوعا تۇسۋگە كەلدى. تورەعالي سۋرەتكە ءتۇستى، ول جاماندىق ويلاعانى ما؟ قولىنداعى ءسابيى بار بالا دا سۋرەتكە تۇسۋگە كەلدى. ءانشى باس تارتپادى. قولتاڭباسىن دا بەردى، جاماندىق ويلاعانى ما؟ ادامنىڭ جۇرەگى اشىق بولۋى كەرەك. ال بالكونداعى كورەرمەننىڭ ايعاي كوتەرۋى ورىنسىز بولدى» ، - دەيدى ول.
اسەتوللا قاريانىڭ ويىنشا، «ۇلى دالا بالاسى» پاۆلودارعا كونسەرتپەن كەلىپ، حالىقتان كەشىرىم سۇراۋ كەرەك.
«بالكىم، ول تەگىن كونسەرتىمەن كەلەدى مە ەكەن. ءتىپتى، كەلمەگەن جاعدايدا حالىقتان كەشىرىم سۇراۋى كەرەك. 21- كۇنى بولعان كورەرمەندەرىن قايتا شاقىرىپ، «حالقىم، ارتىق ايتقانىم بولسا، كەشىرىڭدەر» دەۋىنە بولادى. قىدىرالى بولمانوۆ تا ايتتى، ءار ادام قاتەلەسەدى. سوندىقتان، قازاعىم ءوسسىن دەسە، ءار ادام وعان كەشىرىمدىلىك تانىتادى» ، - دەيدى اسەتوللا مەدەۋوۆ.
ول وزىمەن بىرگە رەداكسياعا بولعان وقيعاعا قاتىستى جازعان حاتىن الا كەلگەن.
ەسكە سالايىق، 21 - جەلتوقسان كۇنى تورەعالي تورەالى پاۆلودار قالاسىندا ەستاي اتىنداعى مادەنيەت سارايىندا «ايحاي-25» اتتى ءان كەشىن وتكىزگەن بولاتىن. كونتسەرت كەزىندە كورەرمەندەردىڭ ءبىرى ءوزىن قىزىلوردادان كەلگەنىن ايتىپ، انشىدەن سۋرەتكە تۇسە بەرمەي، ءان ايتۋى كەرەكتىگىن ۇرىسىپ ايتقان. ساحنادا تۇرعان تورەعاليدىڭ جاۋابى قالىڭ جۇرتشىلىققا ۇناماعان بولاتىن. كەلەسى كۇنى ءانشى ءىnstagram-دا تىكەلەي ەفيرگە شىعىپ، جازىلۋشىلارىنان كەشىرىم سۇرادى.