«سول سەبەپتى ءبىز قۇزىرەتتى مەملەكەتتىك ورگانمەن بىرلەسە وتىرىپ، قىتايعا تاسىمالداناتىن استىعىمىزدىڭ كولەمىن ۇلعايتۋدى پىسىقتاپ جاتىرمىز. قىتاي ارقىلى ترانزيت جاساۋ جاعىن دا قارىستىرۋدامىز. بۇدان بولەك، اۋىل شارۋاشىلىعى مينيسترلىگىمەن بىرلەسىپ، يران ارقىلى قازاقستاندىق استىقتى تاسىمالداۋعا كەلىستىك. يران اشىق ترانزيت بەرەدى. سول ارقىلى پارسى شىعاناعى ەلدەرىنە شىعاتىن بولامىز. ول جاقتا استىقتى دا، مايلى داقىلداردى دا جاقسى تۇتىنادى»، - دەدى ن. مۇحامەدجانوۆ استانادا وتكەن باسپا ءسوز ءماسليحاتىندا.
دەپارتامەنت باسشىسى قازىرگى ۆاگون تاپشىلىعىن دا ءتۇسىندىردى. ونىڭ سوزىنە قاراعاندا، بۇگىندە قازاقستاننىڭ استىعى ورتالىق ازيا مەن اۋعانستانعا ءجيى تاسىمالدانادى. سۇرانىس ازايعاندا ءبارى وسى باعىتقا لاپ بەرەدى. سول كەزدە ۆاگون كەپتەلىستەرى بولادى. «بۇل جەردە ءبىر ماسەلەنى ەسكەرۋ كەرەك، ول جاقتا استىقتى ءتۇسىرۋ جىلدامدىعى بىزدەگى ونى تيەۋ جىلدامدىعىمەن بىردەي ەمەس. سوندىقتان ۆاگوندار ۇزاق تۇرادى، بوس ۆاگوندار ۋاقىتىندا قايتپايدى. تاپشىلىق تا سودان پايدا بولادى»، - دەپ اتاپ كورسەتتى ن. مۇحامەدجانوۆ.
ايتا كەتەيىك، ۇكىمەتتىڭ كەشەگى وتىرىسىندا ق ر پرەمەر- ءمينيسترى باقىتجان ساعىنتايەۆ ديقانداردىڭ استىعىن جوعارى باعامەن ساتىپ الۋعا تاپسىرما بەردى. سەبەبى قىركۇيەك ايىنان باستاپ ىشكى نارىقتا استىقتىڭ باعاسى تومەندەپ كەتتى. وعان بىرنەشە فاكتور اسەر ەتتى. بىرىنشىدەن، بيىل رەسەيدە استىقتىڭ رەكوردتىق كولەمى جينالدى. سودان قازاقستانمەن شەكارالاس ايماقتاردا ارزان استىق كوبەيىپ، زاڭسىز جولمەن تاسىمالدانا باستادى. ەكىنشىدەن، ۆاگونداردىڭ تاپشىلىعى وزەكتى بولىپ تۇر. ۆاگون جەتىسپەگەننەن كەيىن حالىقارالىق ترەيدەرلەردىڭ تالاپتارى ورىندالمايدى. ۇشىنشىدەن، ازىق- تۇلىك كورپوراتسياسى سىلبىر قيمىلداپ جاتىر. اتالعان كومپانيا باسىندا ءبىر توننا استىقتىڭ باعاسىن 42 مىڭ دەپ قويسا، ارتىنان 39 مىڭعا ءتۇسىردى. وسىنىڭ بارلىعى سۇرانىستىڭ تومەندەپ، استىقتىڭ كۇرت ارزانداۋىنا اكەلىپ سوقتىردى.
«سوڭعى ءبىر اپتا بويى ءبىز وسى ماسەلەنى كۇندە پىسىقتاپ كەلەمىز. بارلىعى قولداپ وتىر. قارجىنىڭ كوزىن انىقتادىق. باعانى 42 مىڭ دەپ بەلگىلەدىك. ەندى، استىقتى ساتىپ الۋ شارالارىن ابىرويمەن اتقارىپ شىعۋ قاجەت. ونى جىلدام ءارى اشىق تۇردە وتكىزۋ كەرەك. وسىعان بالانىستى وبلىس اكىمدەرى ارنايى شتابتاردى قۇرسىن. وعان اكىمدىك قىزمەتكەرلەرىن عانا ەمەس «اتامەكەن» پالاتاسى مەن قازاقستاننىڭ فەرمەرلەرى وداعىن دا تارتۋ قاجەت. اقشا ادرەساتقا جەتۋى ءتيىس. رەسەيدىڭ استىعىنا، ءيا بولماسا، ءبىر قولعا كەتىپ قالماسىن. سوندىقتان وسى ماسەلەنى قاتاڭ باقىلاۋدا ۇستاڭىزدار!»، - دەپ اتاپ كورسەتتى ۇكىمەت باسشىسى.
اۆتور: ارمان اسقار