قوعام - ول قابىرعا. ادام - كىرپىش. سول قابىرعاعا ءبىر كىرپىش بولىپ قالانۋ ادامنىڭ ابايدان مىندەتتەلگەن پارىزى. وسىدان 10-15 جىل بۇرىن كىرپىش تەلەفونىن قولىنا ۇستاعان ادامدار بۇگىندە سول تەلەفوننىڭ كەتىگى مەن تەتىگى قايدا قالعانىن بىلمەيدى دە. سەبەبى، زاماناۋي قۇرىلعى دامىدى، قولدانۋشىسى ودان كەيىن بىرنەشە تەلەفون اۋىستىرىپ ۇلگەردى. كەزىندە، ەشكىمنىڭ قولىنان كەزدەسپەيتىن سول تەلەفون بۇگىن قولدانىستان شىعىپ قالدى. قازىرگى زاماننىڭ زاڭدىلىعىنىڭ ءبىرى وسى - تەز قولدانىستان شىعىپ قالۋ. نازارلارىڭىزعا الداعى 20 -جىلدا جوعالىپ كەتۋ الدىندا تۇرعان ماماندىقتاردى ۇسىنامىز.
الداعى شيرەك عاسىردا ءبىلىم سالاسىنا تولاسسىز وزگەرىستەر ەنەدى دەگەن بولجام كوپ. ءبىراق، ونىڭ ساۋاتتى جۇرگىزىلۋىندە كۇمان بار. قازىرگى ۋاقىتتا، اراقاشىقتىق ارقىلى وقۋ جۇيەسى ەندى قولعا الىنىپ كەلە جاتىر. بولاشاقتىڭ ەنشىسىندە وسى ءبىر سالانىڭ دامۋ بولجامى باسىم ەكەن. «مەكتەپكە، ۋنيۆەرسيتەتكە بارماي- اق، ۇيدە وتىرىپ ءبىلىم الۋ ۋاقىت ۇنەمدەۋ ءۇشىن وڭتايلى ءتاسىل» دەيدى ساراپشىلار.
تەحنولوگيانىڭ قارىشتاپ دامۋى قازىرگى كينوتەاتر، مەيرامحانا، قوناقۇي، فيتنەس كلۋبتارداعى اكىمگەرلەردى جۇمىستارىنان ايىرادى دەگەن بولجام بار. قازىرگى كۇننىڭ وزىندە، قوناقۇي بولمەلەرىن، مەيرامحانا ورىندارىنا ارنايى باعدارلاما ارقىلى الدىن الا تولەم جاساۋعا بولادى.
عالامتور ارقىلى ونلاين تولەم جاساۋ ساتۋشى، دۇكەنشى، كاسسير ماماندىقتارىنىڭ ورنىن باسادى. سونىمەن قاتار، جەتكىزۋ قۇرىلعىلارى ارقىلى قالاعان زاتىڭىز ۇيىڭىزگە دەيىن جەتكىزىلەدى.
ب ا ق وكىلدەرىنىڭ دە قىزمەتىندە وزگەرىستەر بولادى. ۋاقىت وتە ەشكىم گازەت شىعارىپ، جۋرنالدى قاعازعا باسپايدى. بۇل باسپا ءسوز قۇرالدارىنداعى اقپاراتتار تەك عالامتور بەتتەرىندە جاريالانادى. بولاشاققا جاسالعان بولجام بويىنشا، الداعى 20 جىلدا وسىنداي وزگەرىستەر بولادى. ءبىراق، بۇل ادام بالاسىنىڭ جۇمىسسىز قالىپ، روبوتتارعا تاۋەلدى بولىپ قالاتىنىن بىلدىرمەيدى. جاڭا قۇرىلعىلار، جاڭا تەحنولوگيا شىققاننان كەيىن جاڭا ماماندىقتاردىڭ دا پايدا بولارى انىق.
Massaget.kz