داريعا نازاربايەۆا: ءاربىر اكىمدە ءبىر- ءبىر تىكۇشاقتان بولۋى كەرەك

استانا. قازاقپارات - ق ر پارلامەنتى سەناتى حالىقارالىق قاتىناستار، قورعانىس جانە قاۋىپسىزدىك كوميتەتىنىڭ ءتورايىمى داريعا نازاربايەۆا اكىمدەرگە ءبىر- ءبىر تىكۇشاقتان بەرۋدى ۇسىندى، دەپ حابارلايدى «قازاقپارات» ح ا ا ءتىلشىسى.

«قازاقستاندىقتار ءالى وسىنداي تىكۇشاقتاردىڭ پايداسىن بىلمەيتىن دە شىعار. مەنىڭشە، سانيتارلىق جانە مەديتسينالىق اۆياتسيا دامۋى كەرەك. ءاربىر اكىمدە، اسىرەسە، اۋىل شارۋاشىلىعى ماڭىزدى ايماقتاردىڭ اكىمدەرىندە ءبىر- ءبىر تىكۇشاقتان بولۋى ءتيىس. 500 شاقىرىمدىق قاشىقتىقتى كولىكپەن ءبىر كۇندە جۇرمەي، تىكۇشاقپەن 2-3 ساعاتتا ۇشىپ جەتۋگە بولادى»، - دەيدى استاناداعى تىكۇشاقتاردى قۇراستىرۋ جانە قىزمەت كورسەتۋ زاۋىتىنا بارعان داريعا نازاربايەۆا.

داريعا نازاربايەۆانىڭ ايتۋىنا قاراعاندا، بۇل قادام شەنەۋنىكتەردىڭ جۇمىسىن جەڭىلدەتە تۇسەر ەدى.

«سونىمەن بىرگە، ۇلكەن قالالاردا ادامدار كوبىنەسە تاڭەرتەڭ نەمەسە كەشكە جاقىن كەپتەلىستە تۇرىپ قالادى. سونداي ۇلكەن قالالاردا مۇنداي تىكۇشاقتار بيزنەس ءۇشىن جانە تاكسي رەتىندە پايدالى بولار ەدى. مەنىڭشە، ءبىزدىڭ ەكونوميكامىزدىڭ بولاشاعى بۇعان مۇمكىندىك بەرەر دەپ ويلايمىن. وسىنداي ونەركاسىپتى ارينە، بارلىق جاعىنان قولداۋىمىز كەرەك. وسىعان ءبىرتالاي قاراجات سالدىق. ارى قاراي داميتىن جولىن ۇكىمەت ارقىلى، بالكىم باعدارلامالار ارقىلى قولداۋ كەرەك»، - دەيدى داريعا نازاربايەۆا «ەۆروكوپتەر قازاقستان ينجينيرينگ» ج ش س تۋرالى.

ەسكە سالا كەتسەك، بۇگىن ق ر پارلامەنتى سەناتى حالىقارالىق قاتىناستار، قورعانىس جانە قاۋىپسىزدىك كوميتەتىنىڭ ءتورايىمى داريعا نازاربايەۆا باستاعان كوميتەت مۇشەلەرى استاناداعى ۇلتتىق عارىش ورتالىعى مەن «ەۆروكوپتەر قازاقستان ينجينيرينگ» ج ش س- دا بولىپ، اتقارىلىپ جاتقان جۇمىستارمەن تانىسقان بولاتىن.

اۆتور: ايان بەكەن ۇلى