قازاقستاندا ۇلى بريتانيانىڭ ەلشىسى ماراپاتتالدى
مەملەكەت باسشىسى نۇرسۇلتان نازاربايەۆتىڭ ك. براۋندى ماراپاتتاۋ تۋرالى جارلىعىنا سايكەس، ەلشى قازاقستان رەسپۋبليكاسى مەن ۇلىبريتانيا اراسىنداعى جەمىستى ىنتىماقتاستى دامىتۋعا سىڭىرگەن ەڭبەگى ءۇشىن قۇرمەت گراموتاسىنا يە بولدى.
ق. ءابدىراحمانوۆ ءتيىمدى ارەكەتتەستىك پەن ساياسي ديالوگتىڭ دامۋىنا، سونداي-اق ەكى ەل اراسىنداعى ەكونوميكالىق ىنتىماقتاستىق پەن مادەني بايلانىستاردى نىعايتۋعا قوسقان ەلەۋلى ۇلەسى ءۇشىن قازاقستانداعى ديپلوماتيالىق ميسسياسىن تامامداپ جاتقان ك. براۋنعا العىسىن ءبىلدىردى. ەلىمىزدىڭ لوندونداعى ەلشىلىگىمەن تىعىز ىقپالداستىقتىڭ ناتيجەسىندە بريتاندىق ديپميسسيانىڭ باسشىسى قازاقستاندى ۇلى بريتانيانىڭ ورتالىق ازيا ەلدەرىنىڭ ىشىندەگى ستراتەگيالىق ارىپتەس رەتىندەگى مارتەبەسىن بەكىتۋگە جاردەمدەستى.
«ك. براۋننىڭ 5 جىلعا جۋىقتاعان قىزمەتى بارىسىندا قازاقستان مەن ۇلىبريتانيا اراسىنداعى قارىم-قاتىناستار جاڭا ساپالى دەڭگەيگە كوتەرىلدى، جوعارى دەڭگەيدەگى ساپارلار ۇيىمداستىرىلدى. بەلسەندى ساياسي ديالوگ پەن ىسكەرلىك توپتاردىڭ بايلانىستارى بۇنىڭ ايعاعى بولىپ تابىلادى»، دەلىنگەن حابارلامادا.
ەكىجاقتى بايلانىستاردى كۇشەيتۋگە باعىتتالعان ۇلەسىن جوعارى باعالاعانى ءۇشىن ك. براۋن قازاقستان باسشىلىعىنا شىنايى العىسىن ءبىلدىردى. ول ءبىرقاتار بىرلەسكەن ءىس-شارالاردى ءساتتى جۇزەگە اسىرۋىنا جول اشقان قازاقستاندىق ديپلوماتتارعا بريتاندىق ەلشىلىگىمەن جەمىستى ارەكەتتەسكەنى ءۇشىن ريزاشىلىعىن ايتتى.