تۇرىك كينەماتوگرافيستەرى ياساۋي، قورقىت تۋرالى فيلم ءتۇسىرۋدى ۇسىندى
كەزدەسۋدە ەكى ەلدىڭ كينو ماماندارى بىرلەسكەن جوبالاردى ءتۇسىرۋدى تالقىلادى.
«ءبىزدىڭ ورتاق مادەنيەتىمىز، تاريحىمىز، ورتاق ءدىنىمىز بار. قوجا احمەت ياساۋي، كوروعلى، قورقىت اتا سەكىلدى ورتاق تۇلعالارىمىز بار. ول قازاقتىڭ نە تۇرىكتىڭ عانا ەمەس، بۇكىل تۇركى الەمىنىڭ تۇلعاسى. ولار ومىرلەرىن جاسامپازدىقپەن وتكىزىپ، ەلدى بەيبىتشىلىككە، ىنتىماققا شاقىرعان. سونداي كەيىپكەرلەرىمىز باردا، تاريحىمىز باردا، بىزگە كوپ كينولار ءتۇسىرۋ كەرەك. ءبىر جەرگە جينالىپ تۋىندىلار شىعارساق، ءار مەملەكەت تولەيتىن قارجىسىن ورتاعا شىعارسا دەگەن وي. ورتاق فيلمدەر ءتۇسىرىپ، بۇكىل الەمگە تۇركى الەمىنىڭ بەيبىت حالىق ەكەنىن پاش ەتسەك» ، - دەدى تانىمال تۇرىك رەجيسسەرى ونەر كىلىچ.
«قازاقفيلمنىڭ» قىزمەتكەرلەرى تۇركيالىق قوناقتار - رەجيسسەر ونەر كىلىچقا، پروديۋسەر احمەت ەدەبالىعا، رەجيسسەر مۇستافا ۋگۋر ياعدجىوعلۋعا جانە جۋرناليست بەدىر اچارعا ستۋديا اۋماعىن ارالاتىپ، وندىرىستىك مۇمكىندىكتەرمەن تانىستىردى. كەزدەسۋ سوڭىندا ەكى تاراپ بولاشاقتا بىرلەسىپ تۇسىرەتىن جوبالاردىڭ سەناريلەرىمەن الماستى.
سوڭعى جىلدارى «قازاقفيلم» بيۋدجەت قارجىسىن ۇنەمدەۋ جانە حالىقارالىق پروكاتقا شىعۋ ماقساتىندا شەتەلدىك سەرىكتەستەرمەن كينووندىرىستى قارقىندى تۇردە دامىتۋدا. وسى ورايدا، پروكاتى ۇلكەن تابىسپەن وتكەن رەسەيمەن بىرلەسىپ تۇسىرگەن «28 پانفيلوۆشى» ءفيلمىن، پروكاتقا ەندى عانا شىققان ۇندىستانمەن بىرلەسكەن «تۋعان ءۇيىم - تىرەگىم» («Love you family» ) فيلمىن جانە اياقتالۋعا جاقىن قالعان «امىرە» (امىرە قاشاۋبايەۆ تۋرالى) اتتى قازاق- امەريكا فيلمىن، ءتۇسىرىلىم كەزەڭىندە تۇرعان قازاق- قىتاي جوباسى «كومپوزيتور» (سي سينحاي مەن باقىتجان بايقاداموۆتىڭ دوستىعى تۋرالى) فيلمىن اتاۋعا بولادى.
تۇرىك فيلمدەرىنىڭ اپتالىعى بيىل ءۇشىنشى رەت تۇركيانىڭ مادەنيەت جانە تۋريزم مينيسترلىگى باستاماسىمەن ۇيىمداستىرىلىپ وتىر. اشىلۋ سالتاناتىندا كورەي سوعىسىنا قاتىسىپ، كىشكەنتاي كورەي قىزىن قۇتقارىپ قالعان تۇرىك وفيتسەرى تۋرالى باياندايتىن «ايلا» اتتى كوركەم فيلم كورسەتىلدى. ءىس- شارا 27 جەلتوقسان كۇنى «تاۋ 2» اتتى كوركەم فيلمىمەن اياقتالادى. كورسەتىلىمدەر «سەزار» كينوتەاترىندا ءوتىپ جاتىر.