ەلىمىزدەگى بەنزين تاپشىلىعى جاۋاپتى ورگانداردىڭ ولاقتىعىنان تۋىندادى - ەلباسى
«اتالعان جاعدايدىڭ سالدارى اۋىر بولعان جوق. بۇل - جاۋاپتى ورگانداردىڭ تولىقتاي ولاقتىعى مەن قاتەلىگى. ءبىز جىل سايىن مۇناي وڭدەۋ زاۋىتتارىن توقتاتىپ، جوندەيمىز. بۇل رەتتە نەلىكتەن ءدال سول ۋاقىتقا سايكەس كەلگەندىگىن انىقتاۋ قاجەت. ىلعي دا الدىن الا دايىندالىپ، مامىردا شەشىم قابىلداپ، قور جيناقتالاتىن. بۇل جۇمىستار جاسالعان جوق. بارى سول. سوڭىنان ءبارى قالپىنا كەلتىرىلدى»، - دەدى مەملەكەت باسشىسى وتاندىق تەلەارنالاردان كورسەتىلگەن سۇحبات بارىسىندا.
ەلباسىنىڭ ايتۋىنشا، قازاقستاندا وزىندە وندىرىلەتىن مۇناي ونىمدەرى جەتىسپەيدى. سوندىقتان جانارمايدىڭ جەتىسپەيتىن كولەمى كورشى رەسەيدەن اكەلىنەدى.
«ەندىگى ۋاقىتتا بارلىق ءۇش مۇناي وڭدەۋ زاۋىتى جوندەلگەننەن كەيىن قازاقستاندى اتالعان رەسۋرستارمەن تولىقتاي قامتاماسىز ەتىپ، شامامەن 1 ميلليون تونناسىن ەكسپورتقا شىعارۋعا مۇمكىندىك الامىز. سوندىقتان ەندىگى ۋاقىتتا مۇنداي بولماۋى قاجەت»، - دەدى نۇرسۇلتان نازاربايەۆ.
مەملەكەت باسشىسى ءتورتىنشى مۇناي وڭدەۋ زاۋىتىن سالۋ ماسەلەسى دە كەزىندە كوتەرىلگەندىگىن ەسكە سالىپ ءوتتى.
«مەن ءتىپتى ءتورتىنشى مۇناي وڭدەۋ زاۋىتىن سالۋ ماسەلەسىن دە كوتەرگەن ەدىم. دەگەنمەن، ماماندار 2025-جىلعا دەيىن بىزگە ءۇش زاۋىت تا جەتكىلىكتى بولاتىندىعىن ايتتى»، - دەدى ق ر پرەزيدەنتى.