قىتايلىق ينۆەستورلار سىرداريانىڭ سول جاعالاۋىنا قۇرىلىس جۇرگىزەتىن بولدى
قىزىلوردا وبلىسىنىڭ اكىمى قىرىمبەك كوشەربايەۆ قىتاي حالىق رەسپۋبليكاسىنىڭ ينۆەستورلارىمەن كەزدەسىپ، ولارعا ءوڭىردىڭ ينۆەستيتسيالىق مۇمكىندىكتەرى تۋرالى بايانداپ بەردى.
«ءبىز كەز كەلگەن ءتيىمدى يدەيالار مەن جوبالاردى قولداپ، ينۆەستورلاردىڭ ناتيجەلى جۇمىس جاساۋىنا بارلىق جاعداي جاساۋعا دايىنبىز. سىزدەر سول جاعالاۋدا قۇرىلىس سالۋعا قىزىعۋشىلىق تانىتقاندارىڭىزدى بىلەمىز، سوندىقتان بولىنەتىن جەر ۋچاسكەلەرىنە قاجەتتى ينفراقۇرىلىمدى تارتۋدى ءوز جاۋاپكەرشىلىگىمىزگە الامىز جانە بىرلەسكەن جۇمىس بارىسىندا جان-جاقتى قولداۋ كورسەتەتىنىمىزدى اتاپ وتكىم كەلەدى»، - دەدى ايماق باسشىسى.
ءوز كەزەگىندە، «دجينان سيان كونستراكشن گرۋپپ ل ت د» كومپانياسىنىڭ باس ديرەكتورى لان ليسياو ارىپتەستىك ورناتقانىنا قۋانىشتى ەكەنىن جەتكىزىپ، ۇزاق مەرزىمدى بىرلەسە جۇمىس جاساۋعا نيەت ءبىلدىردى.
ەستەرىڭىزگە سالا كەتەيىك، اعىمداعى جىلدىڭ قاراشا ايىندا «باونباو» سينتسزيان ساۋدا كومپانياسى» ج ش ق باسقارما ءتوراعاسى ليۋ ۆەي حانىم باستاعان ق ح ر دەلەگاتسياسى Ⅸ حالىقارالىق «بايقوڭىر ينۆەست» فورۋمىنا قاتىسىپ، بىرلەسە جۇزەگە اسىرۋ ءۇشىن 5 جوبا تاڭداعان بولاتىن ( قىزىلوردا قالاسىنداعى قورقىت اتا حالىقارالىق اۋەجايىنىڭ جاڭا جولاۋشىلار تەرمينالىن سالۋ جانە پايدالانۋ، قارماقشى جانە جاڭاقورعان اۋداندارىندا قۇس فابريكالارىن سالۋ، قىزىلوردا قالاسىنىڭ سول جاعالاۋىندا قۇرىلىسىن سالۋ جانە «KazPump» ج ش س ەلەكتر قوندىرعىلارى). بۇل جوبالار بويىنشا جۇمىس الداعى ۋاقىتتا باستالماق.