تۇركيالىقتار قازاقستاندىق جاس رەجيسسەردىڭ فيلمىن تاماشالادى
تۋىندى وسىدان ەكى جىل بۇرىن بولعان رەسەي مەن تۇركيا اراسىنداعى «ۇشاق داعدارىسىنداعى» وقيعانى سۋرەتتەيدى، دەپ جازادى حابار 24.
«ءبىر عانا كيكىلجىڭ قوس ەلدىڭ كوپ جىلدىق ديپلوماتيالىق، ساياسي جانە ەكونوميكالىق سالالارىن ءاپ-ساتتە توقىراتتى. ال اقپارات قۇرالدارى جاڭساق حابار تاراتىپ، جاعدايدى ءتىپتى ۋشىقتىرا ءتۇستى. سوعان قاراماستان بۇل كەلەڭسىزدىك حالىقتاردىڭ ءبىر- بىرىنە دەگەن سىي-قۇرمەتىنە سىزات تۇسىرە المادى. «ياعني كورەرمەن قاۋىمعا وسى وقيعانىڭ مىسالىندا ساياسات پەن الەۋمەتتىڭ اراجىگىن اشىپ كورسەتۋگە تىرىستىم»، - دەيدى رەجيسسەر.
فيلم ىستانبۇل قالاسىندا ءتۇسىرىلدى. الايدا قارجىنىڭ تاپشىلىعىنا وراي تۋىندىعا كاسىبي اكتەرلەر ەمەس، قاراپايىم ازاماتتار تارتىلىپتى. ال شىعارماشىلىق توپ ۋكراينالىق، مەكسيكالىق، مىسىرلىق، ليۆاندىق جانە تۇركيالىق مامانداردان قۇرالعان. كوبى بۇل كارتيناعا ەرىكتى تۇردە قاتىسىپ، ەڭبەكتىڭ جارىق كورۋىنە ءبىر كىسىدەي اتسالىسقان.
«سول ۋاقىتتاعى وقيعانى اقپارات قۇرالدارى ءار قىرىنان تاراتتى. الايدا تەلەديدارداعى ۇگىت-ناسيحات پەن شىنايى ومىردەگى جاعداي اراسىندا كوكپەن جەردەي ايىرما بولدى. فيلمدە وسى ايىرمانىڭ اراجىگىن كورسەتۋگە تىرىستىم»، - دەيدى رەجيسسەر الينا مۇستافينا.
كورەرمەن دۋيگۋ ىشىكتىڭ ايتۋىنشا، ارقاۋ ەتىپ العان تاقىرىبى دا، وقيعا جەلىسى دە وتە وزەكتى.
«تۋىندىنى تاماشالاي وتىرىپ، تۇرىكتەر تۇسىرگەن ەكەن عوي دەگەن ويدا قالدىم. الايدا ونىم بەكەر ەكەن. ويتكەنى ءتۇسىرىلىم توبى كىلەڭ شەتەلدىكتەردەن قۇرالعان. دەمەك ولار فيلمگە كىرىسپەس بۇرىن ىستامبۇلدىڭ كورىكتى ورىندارى مەن جەرگىلىكتى حالىقتىڭ تۇرمىس-تىرشىلىگىن جاقسى زەرتتەگەن»، - دەيدى ول.