قازاقستاندىق «كالكۋلياتور بالا» يندونەزياداعى ءبىلىم باسەكەسىندە باس جۇلدەنى جەڭىپ الدى

وسكەمەن. قازاقپارات - ءىلياس توقتارحان يندونەزياداعى ءبىلىم جارىسىندا گران-پري جەڭىپ الدى، دەپ حابارلايدى «قازاقپارات» ح ا ا ش ق و ىشكى ساياسات باسقارماسىنا سىلتەمە جاساپ.

UCMAS حالىقارالىق اكادەمياسى جىل سايىن بۇكىل الەمدىك اۋقىمدا ءبىلىم باسەكەسىن وتكىزەدى. قازاقستاننىڭ يۋسيماس كومانداسى حالىقارالىق جارىسقا جاس ءبىلىمپازداردان قۇرالعان ەكى دەلەگاتسيا جىبەردى.

49 بالادان قۇرالعان ءبىرىنشى دەلەگاتسيا UCMAS اكادەمياسىنىڭ مەنتالدى اريفمەتيكا بويىنشا 10-11 -جەلتوقساندا مالايزيا استاناسى كۋالا-لۋمپۋردەگى «Genting International Convention Centre» بازاسىندا وتكەن 22- بۇكىل الەمدىك جارىسىندا ەل نامىسىن قورعادى. بيىل وعان 45 ەلدەن جينالعان 3000-نان استام بالا قاتىستى.

22 بالادان قۇرالعان ەكىنشى كوماندا يندونەزيانىڭ بالي ارالىنداعى «Gelanggang Olah Raga» بازاسىندا 9 -جەلتوقسان كۇنى وتكەن مەنتالدى اريفمەتيكادان 18- حالىقارالىق جارىسقا باردى. بيىل وسى ءبىلىم باسەكەسىنە يندونەزيادان 1000 عا جۋىق بالا جانە قازاقستاندىق جاس ءبىلىمپازدار قاتىستى.

جارىس قورىتىندىلارى بويىنشا قازاقستان دەلەگاتسياسى تاماشا ناتيجە كورسەتىپ، ءتۇرلى جاس ساناتتارى بويىنشا 14 التىن جانە كوپتەگەن كۇمىس، قولا مەدالداردى يەلەندى. يۋسيماس اكادەمياسى تاريحىندا ەكىنشى رەت قازاقستان حالىقارالىق جارىستىڭ گران-پريىن يەلەندى، جەڭىمپاز يۋسيماس اكادەمياسىنىڭ رەكتورى، «كالكۋلياتور بالا» ءىلياس توقتارحان بولدى.

«ءبىز كوماندامەن جۇمىس ىستەۋ بويىنشا تاجىريبە جيناقتادىق. قازاقستان جالاۋىن حالىقارالىق ارەنادا بيىككە كوتەرىپ، قازاقستاننىڭ مەملەكەتتىك ءانۇرانى ورىندالعاندا، كەۋدەمىزدى شەكسىز ماقتان سەزىمى كەرنەدى»، - دەيدى 22- جانە 18- حالىقارالىق جارىستاردىڭ جەڭىمپازدارى.