قىتايدىڭ ۇرىمجىسىنەن قازاقستان ارقىلى ەۋروپاعا ازىق-تۇلىك پويىزى جونەلتىلدى - فوتو
پويىز قازاقستاندىق قورعاس ستانتسياسى ارقىلى قازاقستان، رەسەي، پولشا مەن ەۋرووداقتىڭ وزگە دە ەلدەرىن باسىپ ءوتىپ، گوللاندياعا جەتەدى.
بۇل قىتايدان ەۋرووداققا جونەلتىلگەن العاشقى تاۋارلى قۇرام ەمەس، جىل باسىنان بەرى قىتايدان 667 قۇرام جىبەرىلگەن. قىتاي قۇرعاق پورتىنان اتالعان باعىتقا جونەلتىلەتىن پويىزدار سانى بولاشاقتا 700 گە دەيىن جەتكىزىلۋى مۇمكىن.
تەمىرجول قۇرامىنا ازىق-تۇلىك چەندۋ قالاسىنان (قىتايدىڭ وڭتۇستىك باتىسى، سىچۋان پروۆينتسياسى) تيەلگەن. تاۋاردى جەتكىزۋ ۋاقىتى 14 تاۋلىكتى قامتيدى. سالىستىرمالى تۇردە الاتىن بولساق، بۇرىندارى چەندۋ قالاسىنان جونەلتىلەتىن قىتايلىق تاۋارلار تەڭىز ارقىلى جۇرەتىن جانە 60 تاۋلىكتە جەتكىزىلەتىن.
ءۇرىمجىنىڭ حالىقارالىق قۇرعاق پورتىنىڭ كەڭسە باسشىسى ليۋ شاوحۋا قازاقستان ارقىلى وتەتىن جاڭا لوگيستيكالىق تەمىرجول قۇرعاق پورتىنىڭ اشىلۋىنا بايلانىستى كوپتەگەن قىتايلىق تاۋار وندىرۋشىلەر ءوندىرىستى سينتسزيان قالاسىندا قولعا الا باستاعاندىعىن ايتادى.
ل. شاوحۋا ءۇرىمجى قالاسىنان جىبەرىلەتىن حيميالىق تىڭايتقىشتاردىڭ استاناداعى 40-ستانتسياعا 7 كۇن ىشىندە جەتەتىنىن كورسەتتى. الماتىداعى گازدالعان سۋسىن شىعارۋشىلاردىڭ بىرىنە قاجەتتى پلاستيكالىق قاقپاقتار قىتايدان قورعاس ستانتسياسى ارقىلى 4 كۇندە كەلەدى.
بۇل رەتتە قىتاي تاراپى تاۋارلار مەن جۇكتەردىڭ تەمىرجول ارقىلى قازاقستان مەن وزگە دە شەتەلدەرگە جەتكىزۋ كولەمىن ارتتىرۋدى جوسپارلاپ وتىرعاندىعىن ايتا كەرۋ كەرەك.