ماجارستان ەلشىسى: ءبىز قازاقتاردى تۋىس كورەمىز

استانا. قازاقپارات - ق ر- داعى ماجارستاننىڭ توتەنشە جانە وكىلەتتى ەلشىسى اندراش باراني ماجارلىقتار قازاقتاردى تۋىسى دەپ بىلەتىنىن ايتتى، دەپ حابارلايدى «قازاقپارات» ح ا ا ءتىلشىسى.

«ءبىز قازاقتاردى تۋىسىمىز دەپ قابىلدايمىز. ماسەلەن، شىلدە ايىندا عانا استانا مەن بۋداپەشتتىڭ اراسىندا تىكەلەي اۋە رەيسى اشىلعان بولاتىن. مەن قازىر اۋە قىزمەتىنىڭ مەنەدجەنتى ارقىلى جاڭادان ىسكە قوسىلعان رەيستەردىڭ ىشىندە استانا -بۋداپەشت اۋە رەيسى ەڭ ءساتتى ەكەنىن ءبىلىپ وتىرمىن. قازان ايىندا عانا رەيس تولىمدىلىعى 94 پايىزدى قۇراعان. ماجارلىقتاردىڭ باسىم كوپشىلىگى ءوزىنىڭ ءتۇپ تامىرىن ءبىلۋ ءۇشىن وسىندا كەلەدى»، - دەيدى ەلشى و ك ق- دا وتكەن باسپا ءسوز ءماسليحاتىندا.

سونىمەن قاتار، ەلشى ءوز سوزىندە وسى جىلدىڭ قىركۇيەك ايىندا نيۋ-يورك قالاسىنداعى ب ۇ ۇ باس اسسامبلەياسىنىڭ وتىرىسى اياسىنداعى قازاقستاننىڭ ءتوراعالىق ەتۋىمەن وتكەن تۇركى تىلدەس مەملەكەتتەر ىنتىماقتاستىعى كەڭەسىن ەسكە الدى. تۇركى تىلدەس ەلدەردىڭ سىرتقى ىستەر مينيسترلەرىنىڭ بەيرەسمي كەزدەسۋى بارىسىندا ماجارستاننىڭ حالىقارالىق تۇركى اكادەمياسى تولىق قۇقىلى باقىلاۋشى مارتەبەسىن العان بولاتىن.

ەسكە سالا كەتسەك، بۇدان بولەك ماجارستان ۇكىمەتى قازاقستاندىق ستۋدەنتتەر ءۇشىن 200 گرانت ءبولىپ وتىر. ياعني، ونىڭ 90 گرانتى باكالاۆريات، 90 گرانتى ماگيستراتۋرا، 20 گرانت دوكتورانتۋرا بويىنشا بولىنبەك. وقۋ تەگىن. سونىمەن قاتار، قازاقستان تاراپىنان بارعان جاستار ايلىق شاكىرتاقى الادى. ناقتىراق ايتقاندا، باكالاۆريات پەن ماگيستراتۋرادا شاكىرتاقى 130 ەۋرو بولسا، دوكتورانتۋرادا وقيتىن جاستار 420 ەۋروعا دەيىن شاكىرتاقى الادى.