قازاق قىزىنىڭ سۇلۋلىعىنا عاشىق بولعان جىگىت ويلانباستان قازاقستانعا كەلىپ تۇرۋعا كەلىسكەن دەپ حابارلايدى وڭىردەگى NUR. KZ ءتىلشىسى.
«مەنىڭ جۇبايىم نۇرگۇل بايعازينا لولەر قازاق، اقتوبەنىڭ قىزى، تامدى اۋىلىندا تۋىپ وسكەن. قازىر ءبىز بىرگە اقتوبە قالاسىندا تۇرامىز. مەن جۇبايىممەن ول امەريكاعا وقۋعا كەلگەن كەزدە تانىستىم. ءبىر-ءبىرىمىزدى ۇناتىپ، وتاۋ قۇرعاننان كەيىن قازاقستانعا كەلىپ تۇرامىز دەپ شەشتىك. مەنىڭ اقتوبە قالاسىندا تۇرعانىما سەگىز جىل بولادى»، - دەيدى نەيتان لولەر.
اقتوبەدەگى نازاربايەۆ اتىنداعى زياتكەرلىك مەكتەبى ديرەكتورىنىڭ ورىنباسارى قىزمەتىن اتقاراتىن نەيتون لولەر قازاقتاردىڭ كەڭپەيىل مىنەزىنە تاڭدانىسىن جاسىرمادى.
«ماعان قازاقستان قاتتى ۇنايدى. وتە تولەرانتتى مەملەكەت. سەگىز جىلدان بەرى ءبىر ادامنان كەمسىتۋ ءسوز ەستىپ كورگەن جوقپىن. بارلىق ۇلتتار بىرگە، ۇيىمشىلدىقپەن ءومىر سۇرەدى. قازاقستاندىقتاردىڭ وزگە ەل ازاماتتارىنا دەگەن قۇرمەتى وتە ۇنايدى. سونىمەن قاتار، قازاقستانداعى وقۋشىلاردىڭ ءبىلىم دەڭگەيىنە تاڭ قالامىن. ولار وتە دارىندى، ءبىر بالا ءۇش-ءتورت تىلگە دەيىن بىلەدى»، - دەيدى نەيتان لولەر.
امەريكالىق ازامات از عانا ۋاقىتتىڭ ىشىندە قازاق ءتىلىن ۇيرەنىپ العان.
«ماعان قازاق ءتىلىن ۇيرەنۋ قيىن بولعان جوق. امەريكاعا جىلىنا ءبىر-ەكى رەت قانا بارىپ كەلەمىز. وندا مەنىڭ اتا-انام تۇرادى. ول جاقتا ءبىر اپتا عانا بولامىن. سەنسەڭىز، سول ۋاقىتتىڭ ىشىندە ءوزىمنىڭ قازاقستاندى ساعىناتىنىمدى بايقايمىن. سىيلىق رەتىندە اتا-اناما «قازاقستان» شوكولادى مەن كيىمدەر ساتىپ الامىن. بۇل جاقتىڭ شوكولادى ماعان قاتتى ۇنايدى»، - دەيدى ول.
امەريكالىق ازامات قازاق ءتىلىن تاريح ءپانىنىڭ مۇعالىمى بولىپ جۇمىس ىستەيتىن ەنەسىنەن ۇيرەنگەن.
«قازاقتىڭ ەتتەن جاسالعان ۇلتىق تاعامدارى قاتتى ۇنايدى. اسىرەسە، قۋىرداعى ءتاتتى. ونى ەڭ سۇيىكتى تاعامىم دەپ ايتا الامىن. جۇبايىمنىڭ اناسى ونى جاقسى دايىندايدى. ودان كەيىن بەسبارماقتى، كۇرىشتى جاقسى كورەمىن. ءبىز وتباسىمىزدا تەك قازاق تىلىندە سويلەسەمىز. ەنەمنىڭ ءتىلى باي، تاريح ءپانىنىڭ مۇعالىمى. قازاق ءتىلىن سويلەۋدە مەن ول كىسىنى ۇلگى تۇتامىن، سول ادام قۇساپ سويلەۋگە تىرىسامىن»، - دەيدى نەيتان لولەر.
قىسقا اڭگىمەلەسۋدەن كەيىن شەتەل ازاماتى قازاقستاندىقتاردى تاۋەلسىزدىك مەرەكەسىمەن شىن جۇرەكتەن قۇتتىقتايتىنىن ايتتى.