ايىرباس دەيتىنىمىز بەلگىلى، قالادان اۋىلعا قىسقارعان، سورەلەردە كيىلمەي تۇرا بەرگەن كيىمدەر جونەلتىلسە، قىستا اۋىلدان قالاعا سوعىمنىڭ ەتى جىبەرىلەدى. سوعىم سويۋ ءداستۇرى اعايىن تۋىستىڭ باسىن قوسىپ، ءتاتتى قۋىرداقتان ءدام تاتقىزاتىن، جىلىنا 1 رەت قانا كەلەتىن مەيرام دەپ ايتسا بولادى. وسى ءداستۇردىڭ قۇندىلىعىن جوعالتپاۋ قوعامنىڭ قولىندا. سوعىمعا قازاق ءىرى قارا مالدى سويادى. «قىستىڭ قامىن جاز ويلا» دەگەندەي سوعىمعا سويىلاتىن مال الدىن الا 2-3-اي بۇرىن تاڭدالىپ، جەم- سۋى ۋاقىتىندا بەرىلىپ بورداقىلانادى. تاڭدالعان ءىرى قارانى 2-3-اي بويى قيمىلداتپاستان، قاراڭعى قورادا جەمدەيدى. جوسپار بويىنشا، سوعىمنىڭ سويىلار كۇنى كەلگەندە اعايىن- تۋىس شاقىرىلىپ، قاساپشى جىگىتتەر ارنايى سوعىمعا ارنالعان وتكىر پىشاقتارىن، شارىق قايراقتارىن دايىندايدى.
مىقتى ارقاننىڭ كومەگىمەن ءىرى قارانى جىعىپ، اياقتارىن مىقتاپ بايلاپ سوعىم باۋىزداۋعا دايىن بولعاندا جاسى ۇلكەن اقساقال سوعىمعا باتا بەرەدى. ودان ارعى جۇمىس ەر جىگىتتەردىكى. القىمى تازالانىپ، تەرىسى سىپىرىلىپ، قارىنى جارىلعاننان كەيىن قىز- كەلىنشەكتەر ىشەك- قارىندى تازالاۋعا كىرىسەدى. وسىلايشا، ۇدەرىس جالعاسا بەرەدى. سوڭىندا، سوعىم سويىلعان ءۇيدىڭ يەسى وكپە، باۋىردان نەمەسە تەك ەتتەن قۋىرداق دايىندايدى. «سوعىم شۇيگىن بولسىن» ايتىپ كەلگەن قوناقتار استان ءدام تاتادى. تارقاسار ۋاقىتتا قاساپشىلارعا جۇمىسىنىڭ ەڭبەگى ءۇشىن ءبىر- ءبىر اسىم ەتتەن تاراتىلادى. سوعىمعا ءىرى قارانىڭ ىشىنەن جىلقى سويىلعانى دۇرىس. سەبەبى، جىلقى ەتى قىستىڭ كۇنىندە ادامنىڭ كۇش- قۋاتىن ارتتىرىپ، اۋرۋ- سىرقاۋدىڭ الدىن الادى. قازىسى ءدامدى جانە ەتى بويعا ءسىڭىمدى كەلەدى.
ەرتەرەكتە، اتا- بابامىز جىلقى سويعاندا ونىڭ بۇيرەك مايىن شيكىدەي جەگەن ەكەن. قازاقتا «مەشكەي» دەگەن ءسوز، وسى مايدى پىسىرىلمەگەن كۇيىندە جەگەن ادامدارعا ايتىلعان ەكەن. ءبىراق، سوعىم ۋاقىتىندا مال بازارلارىنداعى جىلقىنىڭ باعاسى شارىقتاپ كەتەتىندىكتەن، كوبىسى كىشىلەۋ تايىنشالارعا تالاسىپ جاتادى. كەيبىرەۋلەر، تۇيەنىڭ ەتىن جاقتىرماي، جاعىمسىز ءيىسى بار دەپ سوعىمعا تۇيە سويۋدى قولدامايدى. ءبىراق، حالىق اۋزىنداعى «قۋىرداقتىڭ كوكەسىن تۇيە سويعاندا كورەسىڭ» دەگەن ماقالعا قاراپ تۇيە ەتىنىڭ باسقالارعا قاراعاندا مول بولاتىندىعىنا كوز جەتەدى. سوعىمنىڭ ەتىن ءار ايماقتا ءار ءتۇرلى ساقتايدى. سولتۇستىك قازاقتارى سوعىم سويىلعاننان كەيىن ونى مىندەتتى تۇردە ىستاپ ساقتايتىن بولسا، وڭتۇستىك، شىعىس ايماقتا ەتتى تۇزداپ جايادى. ال كەي وڭىردە ەتتى ساقتايتىن جەر بولماسا، بارلىق ازىقتى سول مالدىڭ قارنىنا سالادى ەكەن. قوي مەن جىلقىنىڭ ەتى ءوزىنىڭ قارنىنا ەركىن سىيىپ كەتەدى.
Massaget.kz