«ەڭبەك ۇجىمدارى قازىرگى تاڭدا وزدەرىنىڭ ۇسىنىستارىن بەرىپ جاتىر. كارل ماركس كوشەسىنە قاتىستى شىعىس قازاقستان وبلىستىق سوتىنىڭ ۇجىمى مەن جىبەك ماتالار كەنتىنىڭ تۇرعىندارى كارل ماركس كوشەسىنىڭ اتاۋىن قازىبەك ءبي كوشەسى دەپ وزگەرتۋدى ۇسىندى. ولار قالالىق اكىمدىككە جازباشا تۇردە ءوتىنىش بەردى. ال اكىمدىكتەگى جۇمىس توبى وسى ۇسىنىستى قاراپ، زەردەلەدى»، - دەيدى قالالىق ءماسليحاتتىڭ دەپۋتاتى مايراش ەكىباسوۆا.
كوشەلەردىڭ اتاۋىن وزگەرتۋ تۋرالى تىڭداۋ بولاتىنى تۋرالى الدىن الا باق ارقىلى قالا تۇرعىندارىنا حابارلانىپ، وتىرىس بۇگىن وتكەن.
«تىڭداۋ كەزىندە وبلىستىق سوتتىڭ ءبىر سۋدياسى، ءبىر اقساقال، قالالىق اكىمدىكتىڭ ءبىر وكىلى مەن دەپۋتاتتار، قالا تۇرعىندارى ءسوز سويلەدى. دەپۋتاتتاردىڭ بىرىنەن «وسى كوشەنىڭ اتىن وزگەرتۋ سول داڭعىلدىڭ بويىندا تۇراتىن تۇرعىنداردىڭ قالتاسىن قاقپاي ما؟» دەگەن سۇراق قويدى. وعان قالا اكىمىنىڭ ورىنباسارى ولگا بۋلاۆكينا جاۋاپ بەرىپ، سول كوشەدەگى 43 ءۇيدىڭ تاقتاشاسىنا 7 مىڭ تەڭگەدەن كەتەتىنىن ايتتى»، - دەيدى مايراش ەكىباسوۆا.
ونىڭ ايتۋىنشا، تاقتاشاعا قاتىستى ءتيىستى سوما قالالىق بيۋدجەتتەن بولىنبەك.
«ءسوز سويلەگەندەردىڭ ءبارى جانە قالالىق ءماسليحاتتىڭ دەپۋتاتتارى ءبىر اۋىزدان قولداۋ ءبىلدىردى. ءبىر عانا تۇرعىن قارسىلىعىن ايتتى. دەپۋتاتتاردىڭ داۋىسىمەن بۇل قۇجات ەندى رەسپۋبليكالىق كوميسسياعا ءتۇسىپ، شەشىم شىعاتىن بولادى»، - دەپ ءتۇيدى ول.
ايتا كەتسەك، كارل ماركس كوشەسى وسكەمەن قالاسىنىڭ ەكى ءىرى ءارى جاڭا اۋدانى ج م ك مەن 19-شاعىن اۋدانىن ءبولىپ تۇرعان باستى داڭعىلداردىڭ ءبىرى بولىپ تابىلادى.