ونىڭ ايتۋىنشا، ۆەدومسۆتو جوعالعان قازاق قىزىنا قاتىستى ماسەلەنى ءجىتى نازارعا الدى.
«اقمارال ءابدىحانوۆانىڭ ماسەلەسى باستى نازاردا. 2010 -جىلى تۇرمىسقا شىققان ول ءۇندىستانعا كەتكەن. سودان بەرى تۋىستارىمەن بايلانىسقا شىعۋدى توقتاتقان. ونى ىزدەۋ بارىسىندا ازاماتتىڭ ماسكەۋدە بولعانىن، كەيىن ماۆريكيگە اتتانعانىن انىقتادىق. سوڭعى مالىمەتتەرگە سايكەس، ول ا ق ش- تا ءجۇر. ەكى كۇن بۇرىن اناسى بىزگە حابارلاسىپ، قىزىنىڭ قانداي شتاتتاردا بولۋى مۇمكىن ەكەنىن بولجاپ ايتتى. سودان كەيىن ءبىز كونسۋل قىزمەتكەرلەرىنە قىزدى ىزدەستىرۋ ءۇشىن ءتيىستى نۇسقاۋ بەردىك» ، - دەدى ول بريفينگتە.
سونىمەن قاتار ارداق ماديەۆ اتالعان ماسەلەنىڭ نە سەبەپتى ۋشىققانىن ءتۇسىندىردى.
«مۇندا باستى پروبلەما كەلىنشەكتىڭ وزىندە بولىپ تۇر. سەبەبى ول تۋىسقاندارىمەن مۇلدە ارالاسپايدى. ال اناسىمەن بايلانىسقا شىقپايدى، ءوزى ەشكىمنەن كومەك تە سۇرامايدى» ، - دەپ تۇيىندەدى ءسوزىن كونسۋلدىق قىزمەت دەپارتامەنتىنىڭ ديرەكتورى.
ايتا كەتەيىك، سۋرەتتەگى سەندي تايلاميممەن اقمارال الماتىدا تانىسىپتى. كەيىن 21 جاستاعى بويجەتكەن وزىنەن 20 جاس ايىرماشىلىعى بار ءۇندى ازاماتىمەن ءسوز جاراستىرىپتى. ءتىپتى قازاق قىزىنا عاشىق بولعان شەت ەلدىك كۇيەۋ قالىڭدىعىنا ءوزىنىڭ فيرماسىنا ديرەكتور قىزمەتىن ۇسىنعان كورىنەدى. ارتىنشا بىرگە بولۋعا ءسوز بايلاسىپ، اتا-اناسىنا تانىستىرۋ نيەتتە ءۇندى اسادى. قايتىپ كەلگەندە اقمارال بارعان جەرىنىڭ سالتىنان بولەك بۋددا ءدىنىن دە قابىلداپ ۇلگەرىپتى.
«قىزىم ءبىرتۇرلى وزگەرىپ كەلدى. ءۇش بولمەلى ءۇيدىڭ ءبىر بولمەسىنە كىرىپ كەتىپ، جوق، جوق. سوسىن قاراسام وتىر بۇرىشتا. الدىنا سۋرەتتەردى قويىپ قويىپتى. ءۇندىنىڭ سۋرەتتەرىن. «كەلىن» كينوسى بار عوي سونداعى قوڭىراۋ، كىشكەنتاي ىدىستار سوندايدى قويعان. ءتۇتىن شىعىپ جاتىر، ءسويتىپ بىلاي وتىر. قىزىم-اۋ نە ىستەپ وتىرسىڭ دەسەم، قۇدايعا تابىنىپ وتىرمىن دەيدى» دەپ قىزدىڭ شەشەسى ساۋلەحان ءابدىحانوۆا ايتىپ وتىر.
جات دىنگە بەت بۇرعان قىزىن قايتا يسلامعا يلاندىرۋ مۇمكىن بولماپتى. وسىلايشا ءوز توركىنىن تانىماعان اقمارال كەيىن ەشكىمگە ەسكەرتپەي ءبىر جولا ماۆريكي ارالىنا كوشىپ كەتىپتى. جاقىندارىمەن تەك تەلەفونمەن تىلدەسىپ تۇرعان كورىنەدى. اناسى سوڭعى رەت ءتورت جىل بۇرىن سويلەسكەندە قىزىممەن تىلگە كەلىپ قالدىم دەيدى. داۋعا قىزىنىڭ ءۇندىستان ازاماتتىعىن الۋ ءۇشىن تۋۋ تۋرالى كۋالىگىن سۇراۋى سەبەپ بولعان. شەشەسى قىزىنا «سەن قازاقتىڭ قىزىسىڭ ول جاقتا قالمايسىڭ، بەرمەيمىن» دەگەن. اناسىنىڭ بۇل سوزىنە اشۋلانعان ول تەلەفوندى قويا سالعان. سودان كەيىن قىزى مۇلدەم حابارلاسپايتىن بولعان.
سودان بەرى قىزىمەن بايلانىس مۇلدەم ۇزىلگەن. تەك وسى جىلدىڭ ناۋرىزىندا بەلگىسىز ءنومىر ءجيى سوعىپتى. ءبىراق ءۇزىلىپ، داۋسى ەستىلمەي دال بولعان. بۇل «قىزىمنىڭ قۇلدىقتا وتىرعانىنىڭ» بەلگىسى دەيدى انا. كۇدىگى كۇشەيگەن سوڭ سىرتقى ىستەر مينيسترىنە ارىز جازىپتى. ونداعىلار سونداعى ەلشىلىككە حات جولداعانمەن ماردىمدى جاۋاپ الا الماپتى. ءسويتىپ ىزدەۋ ءىسىن كوشى-قون قىزمەتىنە تاپسىرعان. قازىر ۇشتى-كۇيلى جوعالعان قىزدى حالىقارالىق قىلمىستىق پوليتسيا ىزدەستىرمەك.