اقتوبە وبلىسى، العا اۋدانىنىندا تۇراتىن التىنبەك سەيداليەۆ بۇعان دەيىن ءانشى ديماش قۇدايبەرگەن، بوكسشى گەننادي گولوۆكيننىڭ پورترەتىن سالعان بولاتىن. بۇعان دەيىن حابارلاعانىمىزداي، شەبەر بىرەگەي تەحنولوگيا ارقىلى جاپىراقتى شايعا قايناتىپ، باستىرادى، كەيىن ميكروسكوپپەن سۋرەت سالادى.
«تاۋەلسىزدىك كۇنىنە وراي قايرات رىسقۇلبەكوۆتىڭ سۋرەتىن سالدىم. مەن كەز كەلگەن ادامنىڭ پورترەتىن سالمايمىن، ءبارى جۇرەك قالاۋىممەن، تاڭداۋىممەن بولادى. ءارى سۋرەت سالعان كەزدە جانىم تىنىشتىقتى قالايدى، ەشكىم كەدەرگى كەلتىرمەيدى»، - دەدى التىنبەك سەيداليەۆ.
شەبەر الداعى ۋاقىتتا كىمدەردىڭ پورترەتىن سالاتىنىن ايتا المادى. سەبەبى، ول جاپىراققا پورترەت سالار كەزدە ەشقانداي جوسپار قۇرمايدى. گۇل ساتاتىن دۇكەندەرگە بارىپ، جاپىراق تاڭداعاندى ۇناتاتىن ول مۋزەيگە بۇيىمدارىن تاپسىرماعان. ءبارى وزىندە، مەكتەپتە ساقتاۋلى. ال ارنايى جاسالعان پورترەتتەر كوبىنە سىيعا بەرىلەدى.
اۆتور: التىناي ساعىندىقوۆا