ءمالىم ەتىلگەندەي، ۆلاديمير پۋتين مەن رەجەپ تايپ ەردوعان جابىق ەسىك جاعدايىندا تار اۋقىمداعى كەلىسسوزدەر وتكىزدى. ول ءبىر ساعاتقا جۋىق جالعاستى.
ونىڭ ناتيجەسى بويىنشا مەملەكەتتەر باسشىلارى باسپا ءسوز ءماسليحاتىن وتكىزدى.
تۇركيا باسشىسى قورعانىس سالاسىن تىلگە تيەك ەتە كەلە، تۇركيا مەن رەسەي وكىلدەرى ءبىر اپتا ىشىندە كەزدەسۋ وتكىزىپ، س-400 زەنيتتى- راكەتالىق كەشەندى ساتىپ الۋ ماسەلەسى بويىنشا تالقىلاۋدى اياقتايتىنىن جەتكىزدى.
ەردوعان سونداي-اق ۆلاديمير پۋتينمەن كەلىسسوز بارىسىندا سيرياداعى احۋالدى تالقىلاعانىن اتاپ ءوتتى. ونىڭ ايتۋىنشا، بۇل باعىتتاعى كەلەسى قادام - بارىنشا جاقىن ۋاقىتتا سوچيدە سيريا بويىنشا جاڭا كەزدەسۋدى وتكىزۋ بولادى.
تۇركيا پرەزيدەنتى تاياۋ شىعىستاعى جاعدايعا قاتىستى دا ايتىپ ءوتتى.
ونىڭ اتاپ وتۋىنشە، يەرۋساليم ماسەلەسى بويىنشا تۇركيا مەن رەسەيدىڭ ۇستانىمى كوپ جاعدايدا ۇقساس. «اتالمىش ماسەلە بويىنشا بايلانىستاردى جالعاستىرۋ تۋرالى شەشىم قابىلدادىق»، - دەدى تۇرىك ەلىنىڭ باسشىسى.
ال رەسەي پرەزيدەنتى تۇركيالىق ارىپتەسىمەن ءبىرىنشى كەزەكتە تاياۋ شىعىستاعى احۋالدىڭ ۋشىعۋى مەن سيريالىق جانجالدى تالقىلاعاندىعىن ايتتى.
پۋتين ءوز سوزىندە تۇركيا مەن رەسەي ا ق ش- تىڭ يەرۋساليمدى يزرايلدىڭ استاناسى رەتىندە تانۋ شەشىمىن جاعدايدى تۇراقسىزداندىرۋ دەپ سانايتىنىن جەتكىزدى. ولاردىڭ پايىمىنشا، پالەستينانىڭ مارتەبەسى بويىنشا ماسەلەدە يزرايل مەن پالەستينا اراسىندا تىكەلەي بايلانىستار قاجەت.