ساپاربايەۆ كابينەتتە وتىرىپ، قولىن قالتاسىنان شىعارماي جۇرەتىن شەنەۋنىكتەردى سىنادى
اقتوبە وبلىسىنىڭ اكىمى بەردىبەك ساپاربايەۆ العا اۋدانىنداعى مەكتەپ- ينتەرناتتىڭ قۇرىلىسىن سىنعا الدى. 600 ورىندى ءبىلىم ورداسى اۋدانداعى ءۇش اۋىسىمدى مەكتەپ پروبلەماسىن شەشۋگە مۇمكىندىك بەرەدى. ءبىراق قۇرىلىس جۇمىستارى كەزىندە ءبىرقاتار كەمشىلىكتەر جىبەرىلگەن.
ماسەلەن، ءبىر مەكتەپتە ەكى باستى كىرەبەرىس بار. بۇل جوعارى جانە باستاۋىش سىنىپ وقۋشىلارىنا ارنالعانىمەن، بوس ورىندى بولمە ەتىپ قايتا جابدىقتاۋعا تاپسىرما بەرىلدى. سونىمەن قاتار، مەكتەپتىڭ ءماجىلىس زالىندا بىرنەشە بەتتى ارلەۋ بولمەسى قاراستىرىلعان. ءوڭىر باسشىسى تاپسىرىس بەرۋشى اقتوبە وبلىستىق قۇرىلىس، ساۋلەت جانە قالا قۇرىلىسى باسقارماسىنىڭ قاتەلىگىن بەتىنە باستى.
«ءبىر مەكتەپكە ەكى ەسىك كەرەك ەمەس. ۇنەمى ەسكەرتۋ جاسايمىن. جوبانى قاراپ، قۇرىلىس جۇمىستارىن تەكسەرىپ وتىرعان دۇرىس. ارتىعىن الىپ تاستاپ، قاجەتتىسىن جوباعا ەنگىزۋ قاجەت. تەحنيكالىق باقىلاۋ، اۆتورلىق باقىلاۋ قايدا قاراپ وتىر؟ كابينەتتەن شىعىپ، قاراۋ كەرەك. ءتىپتى، مەكتەپتەگى ءماجىلىس زالىنا ءۇش بەتتى ارلەۋ بولمەسىن جاساپ قويعان. بۇرىن ەسكەرتۋ جاساپ، باسقا اۋداندا الدىرىپ تاستاعان ەدىم. سول قاتەلىكتى ەكىنشى رەت جىبەرىپ تۇرسىڭدار»، - دەدى اقتوبە وبلىسىنىڭ اكىمى بەردىبەك ساپاربايەۆ.
ءوڭىر باسشىسى اقتوبە وبلىستىق قۇرىلىس، ساۋلەت جانە قالا قۇرىلىسى باسقارماسى باسشىسىنىڭ مىندەتىن اتقارۋشى نۇرتاس سەيىتوۆكە كابينەتتە وتىرىپ ەمەس، قۇرىلىستى ارالاپ ءجۇرۋدى تاپسىردى.
ايتا كەتەيىك، العا اۋدانىنداعى 600 ورىندى مەكتەپ، 100 ورىندى ينتەرنات قۇرىلىسى كەلەر جىلى پايدالانۋعا بەرىلەدى. قۇرىلىس جۇمىستارىنا 1,7 ميلليارد تەڭگە جۇمسالىپ جاتىر. ال 2018-2019 -جىلدارى اقتوبەنىڭ حرومتاۋ اۋدانىندا دا مەكتەپ- ينتەرنات سالىنادى. اقتوبە وبلىسىنىڭ اكىمى بەردىبەك ساپاربايەۆ ءوڭىردىڭ بارلىق اۋدان ورتالىعىنا ءدال وسى جولمەن مەكتەپ- ينتەرنات سالۋدى جوسپارلاۋ قاجەت ەكەنىن ايتتى. قازىر ءۇش اۋداندا بار.
اۆتور: التىناي ساعىندىقوۆا