يليا يلين: توكيو وليمپياداسى تۋرالى قازىر ەشتەڭە ايتا المايمىن
بۇل تۋرالى ورتالىق كوممۋنيكاتسيالار قىزمەتىندە باسپا ءسوز ءماسليحاتىن وتكىزگەن سپورتشىنىڭ ءوزى ءمالىم ەتتى، دەپ حابارلايدى «قازاقپارات» ح ا ا ءتىلشىسى.
«ءبىر جىل بۇرىن ۇلكەن سپورتتا ماعان قاتىستى ماسەلە تۋىنداعان ەدى. ۋاقىت ءوتتى. ءبارى اياقتالعان سوڭ سپورتقا ورالۋعا ۋادە بەرگەن ەدىم. سول ءۇشىن ەسەپ بەرىپ وتىرمىن. ەكىنشىدەن، ەڭ الدىمەن قولداۋ بىلدىرگەن حالىققا العىس بىلدىرگىم كەلەدى. جاعدايعا قاراماستان، ءالى دە حالىقتىڭ ارقاسىندا قيىندىقتاردى ەڭسەرىپ كەلەمىن. كوشەدە كورگەندەر ءبىراۋىزدان «مىقتى بول» دەگەنى مەنى رۋحتاندىرادى»، - دەيدى يليا يلين.
يليا يلين ق ر اۋىر اتلەتيكا فەدەراتسياسى تاراپىنان بارلىق ارەكەت جاسالعانىن اتاپ ءوتتى. سونىمەن قاتار ول توكيو وليمپيداسىنا قاتىسۋ تۋرالى سۇراققا جاۋاپ بەردى.
«مەن قازىر ەشتەڭە ايتا المايمىن. سەبەبى، ەكى كۇن عانا ءوتتى. بىرىنشىدەن، مەن ءالى 29 جاستامىن. ءىرى جارىسقا قاتىسۋعا بارلىق جاعدايىم بار. پوموستتا ءالى دە كۇش-قۋاتىمدى كورسەتكىم كەلەدى. ءبىزدىڭ سپورتتىق باسقارمامەن سويلەسۋ كەرەك. البەتتە، مەنىڭ اعزامنىڭ ساۋلىعىن، ءىرى جارىسقا ساي كەلەتىنىن تولىق تەكسەرۋىمىز كەرەك. وسىعان دەيىن ارينە، سپورتتان قول ۇزگەن جوقپىن. ءبىراق 1,5 جىل بويى دەنەگە سالماق تۇسىرمەدىم. ياعني، سپورتتىق جاعدايدا بولمادىم. سوندىقتان، دارىگەرلەر «اعزاڭ ساي كەلەدى، جۇرەك شىدايدى» دەسە، 95 پايىزعا وليمپياداعا بارۋ تۋرالى شەشىم قابىلدايمىن»، - دەيدى يليا يلين.
ەسكە سالا كەتسەك، حالىقارالىق وليمپيادا كوميتەتى قازاقستاندىق اۋىر اتلەت يليا يليننىڭ بەيجىڭدەگى جانە لوندونداعى التىن مەدالدارىن ايىرۋ تۋرالى شەشىم شىعارعان بولاتىن. ح و ك- تىڭ ءتارتىپ كوميسسياسىنىڭ شەشىمىنە سايكەس «ا» جانە «ۆ» دوپينگ سىناماسىنىڭ قورىتىندىسى بويىنشا ەكى جازعى وليميادا ويىندارىندا چەمپيون اتانعان قازاقستاندىق سپورتشى يليا يليننىڭ بۇعان دەيىنگى كورسەتكىشتەرى جويىلعان ەدى.