بەس مىڭعا جۋىق ازامات راديكالدى رايلارىنان قايتتى - ەرجان مالعاجى ۇلى
ەسكە سالساق، بۇگىنگى قۇرىلتاي بارىسىندا قازاقستاننىڭ 2018-2022 -جىلدار كەزەڭى ارالىعىنداعى باس ءمۇفتيى بولىپ سەرىكباي قاجى وراز ۇلى سايلاندى.
قازاقستان مۇسىلماندارى ءدىني باسقارماسىنىڭ بۇرىنعى باس ءمۇفتي ەرجان قاجى مالعاجى ۇلى ءوزى قىزمەت اتقارعان 2013-2017 -جىلدار ارالىعىندا ىسكە اسىرىلعان جۇمىستار جونىندە ەسەپ بەردى.
ەرجان مالعاجى ۇلى اتاپ وتكەندەي، وتكەن ءتورت جىلدا اتقارىلعان جۇمىستار ناتيجەسىندە جات اعىمنىڭ ارباۋىندا جۇرگەن 940 ازامات حانافي مازحابىن تاڭداپ، قاتارىمىزعا قوسىلدى. سونداي- اق 4967 ادام راديكالدى رايلارىنان قايتقان.
«ءبىز 2014 -جىلى ءدىني جولىمىز بەن باعدارىمىزدى ايقىندايتىن، مەملەكەت تۇتاستىعىنىڭ نىعايا تۇسۋىنە سەپتىگىن تيگىزەتىن ءدىني باسقارمانىڭ 2020 -جىلعا دەيىنگى دامۋ تۇجىرىمداماسىن قابىلدادىق. ءدىني قىزمەتتىڭ ساپاسىن ارتتىرۋعا ارنالعان 4 باعىتتى بەكىتتىك. ولار - كوركەم ۋاعىز، جات اعىمنىڭ جەتەگىندە كەتكەن جاستارمەن جۇمىس، قايىرىمدىلىق ءىس- شارالار جانە حالىقتى ءدىني ساۋاتتاندىرۋ.
ەلىمىزدەگى مۇسىلمان قاۋىمىن بىرلىككە ۇندەپ، وزگە ءدىن وكىلدەرىمەن بەيبىت ءومىر سۇرۋگە شاقىراتىن ق م د ب- نىڭ تۇعىرناماسىن بەكىتتىك. مازحاب پەن نانىم- سەنىمدە جىككە بولىنبەۋگە شاقىراتىن قۇجات ءوز جەمىسىن بەرۋدە. اتالمىش تۇعىرناما - قازاقستان رەسپۋبليكاسى كونستيتۋتسياسىنىڭ سەنىم بوستاندىعى تۋرالى ۇستانىمىنا، قازاقستان رەسپۋبليكاسىنىڭ «ءدىني قىزمەت جانە ءدىني بىرلەستىكتەر تۋرالى» زاڭىنا، ەلىمىزدىڭ 2050 -جىلعا دەيىنگى ستراتەگيالىق دامۋ جوسپارىنا، ق م د ب- نىڭ جارعىسىنا نەگىزدەلىپ ازىرلەنگەن ستراتەگيالىق قۇجات»، - دەپ اتاپ ءوتتى ول.
سونداي- اق ءمالىم ەتىلگەندەي، مەشىتتەگى جاماعاتتىڭ اۋىزبىرشىلىگىن ارتتىرىپ، بىرەگەي قۇلشىلىق جاساۋ ءتارتىبىن ورناتۋ ماقساتىندا ق م د ب مەشىتتەرىنىڭ ەرەجەسى قابىلداندى. 2015 -جىلى اقپاندا ەلىمىزدە تۇڭعىش رەت «يسلام - بەيبىتشىلىك پەن كەلىسىم ءدىنى» تاقىرىبىندا 1 - رەسپۋبليكالىق يمامدار فورۋمى ءوتتى. شارا اياسىندا «قازاقستان مۇسىلماندارى ءدىني باسقارماسىنىڭ تۇعىرناماسى»، «ءدىن قىزمەتكەرىنىڭ ەتيكاسى»، «يمامنىڭ تۇلعالىق كەلبەتى»، «مۇسىلمان كەلبەتى» اتتى ماڭىزدى قۇجاتتار قابىلداندى.
«ق م د ب جانىنداعى عۇلامالار كەڭەسىنىڭ جاڭا قۇرامى جاساقتالدى. كەڭەستە 17 عالىم جۇمىس ىستەيدى. ونىڭ 9-ى عىلىم دوكتورى، قالعانى ماگيسترلەر. ءبىز ءدىني باسقارما قىزمەتى اياسىندا 2014-2015 -جىلدى «ءدىن مەن ءداستۇر» جىلى دەپ جاريالادىق. ق م د ب جانىنان ءدىني ءبىلىمى تەرەڭ، تاجىريبەسى مول بىلىكتى ءدىن عالىمدارىنىڭ باسىن بىرىكتىرگەن اقپاراتتىق ناسيحات توپتارى قۇرىلدى. ولار حالىق اراسىندا ءتۇسىندىرۋ جۇمىستارىن جۇرگىزدى. جات اعىمعا كەتكەن جاستارىمىز ءداستۇرلى حانافي مازھابىن تاڭداپ، ورتامىزعا ورالۋدا. 2017 -جىلى اتقارىلعان جۇمىستار ناتيجەسىندە جات اعىمنىڭ ارباۋىندا جۇرگەن 940 ازامات حانافي مازحابىن تاڭداپ، قاتارىمىزعا قوسىلدى. 2013-2017 -جىلدار ارالىعىندا جالپى سانى 4967 ادام راديكالدى رايىنان قايتتى»، - دەدى ول.
ايتا كەتسەك، قازاقستان مۇسىلماندارى ءدىني باسقارماسىنىڭ كەڭسەسى 2014 -جىلى الماتىدان استانا قالاسىنا كوشىرىلگەن بولاتىن.
اۆتور: گۇلميرا عوسمانالي