قوجامجاروۆ شەتەلدەگى اقشانى ەلگە قايتارۋعا قاتىستى تۇسىنىك بەردى

 استانا. قازاقپارات - ق ر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ ءتوراعاسى قايرات قوجامجاروۆ شەتەلدە جاتقان اقشانى قايتارۋعا قاتىستى پىكىر ءبىلدىردى، دەپ حابارلايدى قازاقپارات ءتىلشىسى.

 

يندۋستريالاندىرۋ كۇنىنە ارنالعان جيىندا ق ر پرەزيدەنتى نۇرسۇلتان نازاربايەۆ شەتەلدە جاتقان اقشانى قايتارۋعا تاپسىرما بەرگەن بولاتىن. قازىرگى ەسەپكە سايكەس، 18 وتاندىق كومپانيا 12,5 ميلليارد دوللاردى شەتەلدە ۇستاپ وتىر. بۇگىن استانادا باستالعان حالىقارالىق كونفەرەنسيادا قايرات قوجامجاروۆ وسى اقشانى قايتارۋ ماسەلەسىن كوتەردى.

اگەنتتىك باسشىسىنىڭ ايتۋىنشا، قازىرگى زاڭنامادا ۇلتتىق كومپانيالاردىڭ اقشانى شەتەلگە شىعارۋىنا قاتىستى ناقتى شەكتەۋ جوق.

«قازىرگى جاعدايدا اقشانى ەلگە قايتارىلعانى قاجەت. پرەزيدەنت وسى ماسەلەگە باسا نازار اۋداردى. قولدانىستاعى زاڭنامادا ناقتى شەكتەۋ جوق. دەگەنمەن، ول جۇمىستى جاساۋعا ابدەن بولادى دەپ ويلايمىن. ونىمەن ۇكىمەت تە، ۇلتتىق كومپانيا باسشىلارى دا اينالىسادى. ەندى، بۇل - ۇرلانعان، ءيا بولماسا، قىلمىستىق جولمەن كەلگەن اقشا ەمەس. ول - قازاقستاننىڭ ءوز اقشاسى، رەسمي قاراجاتى. ونى ەلگە قايتارۋ قاجەت. وسى جۇمىسقا ءبىز دە اتسالىساتىن بولامىز»، - دەدى قوجامجاروۆ جۋرناليستەرگە بەرگەن سۇحباتىندا.

ايتا كەتەيىك، پرەزيدەنت نۇرسۇلتان نازاربايەۆ شەتەلدەگى قارجىنى قايتارۋعا قاتىستى ارنايى زاڭنامانى ازىرلەۋدى تاپسىردى. مەملەكەت باسشىسىنىڭ ايتۋىنشا، بۇگىندە 18 وتاندىق كومپانيا 12,5 ميلليارد دوللاردى شەتەلدە ۇستاپ وتىر.

اتاپ ايتقاندا، «تەڭىز شيەۆرويل» كومپانياسى - 4,5 ميلليارد دوللار، «قاز مۇناي گاز» ۇلتتىق كومپانياسى - 3 ميلليارد دوللار، «قاز مۇناي گاز بارلاۋ مەن ءوندىرۋ» كومپانياسى - 2 ميلليارد دوللار، «ازيا گاز قۇبىرى» ج ش س - 1 ميللياردتان استام، «بەينەۋ-شىمكەنت» گاز قۇبىرى» ج ش س - 100 ميلليون دوللار، بۇدان بولەك، «شىعىس سەمەنت»، «جايىق مۇناي»، كاسپي قۇبىرى كونسورتسيۋمى جانە تاعى باسقا كومپانيالار شەتەلدە قىرۋار قاراجاتتى ۇستاپ كەلەدى.

«نەگە ولاي ىستەيسىزدەر؟ قازاقستاننىڭ رەسۋرستارىن ساتىپ، اقشا تاباسىزدار؟ ال تابىستى شەتەلدە ۇستايسىزدار. نەگە ول اقشا وسىندا اينالىپ، ەل ەكونوميكاسىنا جۇمىس ىستەمەيدى؟ جارتى جىلدىڭ ىشىندە مەملەكەتكە قاراستى كومپانيالار شەتەلدەگى قارجىسىن 2 ميلليارد دوللاردان 6 ميللياردقا دەيىن ۇلعايتتى. سىزدەر نەنى كۇتىپ وتىرسىزدار؟! مەن وسىنى تۇسىنبەيمىن»، - دەپ اتاپ كورسەتتى پرەزيدەنت جالپى حالىقتىق تەلەكوپىر كەزىندە.